Žančyny z pakaleńnia Z i milenijałaŭ pieravaročvajuć suśvietny rynak mastactva

Apošniaje daśledavańnie zvyčak, pavodzin i vydatkaŭ kalekcyjanieraŭ kanstatuje fundamientalny zruch: maładyja, zamožnyja žančyny z pakaleńnia Z i milenijałaŭ stali nie prosta aktyŭnymi ŭdzielnicami, ale i klučavymi drajvierami rostu na suśvietnym rynku mastactva, značna pieravyšajučy pa vydatkach svaich kaleh-mužčyn.

Fota: Vecteezy.com

Štohadovaje daśledavańnie Art Basel & UBS Survey of Global Collecting u hetym hodzie achapiła 3100 asob z vysokim uzroŭniem dachodu ź dziesiaci rynkaŭ mastactva: ZŠA, Vialikabrytanija, macierykovy Kitaj, Hankonh, Francyja, Šviejcaryja, Hiermanija, Japonija, Brazilija, Sinhapur.

Pravodziačy apytańnie, aŭtary imknulisia vyśvietlić, jaki adsotak svajho bahaćcia kalekcyjaniery vydzialajuć na mastactva; dzie jany nabyvajuć tvory (halerei, aŭkcyjony, anłajn-kanały), jakija vidy mastactva i abjekty ich cikaviać (ličbavaje mastactva, dyzajn, antykvaryjat); jak hiendar, uzrostavaja hrupa i hieahrafija ŭpłyvajuć na pavodziny kalekcyjanieraŭ.

Jak adznačaje The Art Newspaper, daśledavańnie pakazała, što ŭ 2024 hodzie zamožnyja žančyny z vysokim uzroŭniem asabistaha kapitału (HNWI — High-Net-Worth Individual, ich likvidnyja finansavyja aktyvy składajuć nie mienš za $1 miljon) vydatkavali na mastactva na 46% bolš, čym mužčyny z takimi ž dachodami.

Hety fienomien całkam palahaje na aktyŭnaści maładych pakaleńniaŭ. Žančyny-milenijałki ŭ 2024 hodzie vydatkavali ŭ siarednim 643 700 dalaraŭ na tvory mastactva, što źjaŭlajecca adnym z samych vysokich pakazčykaŭ siarod usich hrup.

Žančyny z pakaleńnia Z vydatkoŭvali ŭ siarednim 537 400 dalaraŭ — sumu, jakaja bolš čym udvaja pieravyšaje vydatki mužčyn ich uzrostu. Asabliva jarka hetaja tendencyja prajaviłasia ŭ Azii: milenijałki z macierykovaha Kitaja i Japonii demanstravali biesprecedentna vysokija hadavyja vydatki.

Bolš ryzyki i ŭvahi da novych imionaŭ

Spravazdača razburaje stereatyp ab tym, što žančyny bolš aściarožnyja ŭ finansavych i inviestycyjnych ryzykach. U śfiery mastactva žančyny demanstrujuć bolšuju hatoŭnaść nabyvać pracy novych i niepravieranych aŭtaraŭ.

Amal 55% apytanych žančyn pryznalisia, što časta abo niaredka kuplali mastactva ŭ nieviadomych mastakoŭ, u toj čas jak siarod mužčyn hety pakazčyk skłaŭ 44%. Heta śviedčyć pra aktyŭny padychod da farmiravańnia kalekcyi i žadańnie adkryvać śviežyja hałasy, a nie prosta prytrymlivacca «błakitnych fišak» rynku.

Akramia taho, maładyja žančyny-kalekcyjaniery śviadoma padtrymlivajuć hiendarnuju roŭnaść u svaich zborach. U siarednim 49% tvoraŭ u žanočych kalekcyjach byli stvorany mastačkami, u toj čas jak u mužčynskich — tolki 40%. U ZŠA i Japonii hety pakazčyk siarod žančyn pieravysiŭ 50%.

Fota stvorana štučnym intelektam / Vecteezy.com

Źmiena hustaŭ i kanałaŭ pakupki

Pobač z rostam vydatkaŭ adbyvajecca i źmiena ŭ samich padychodach da kalekcyjanavańnia. U toj čas jak pakaleńni bebi-bumieraŭ aryjentavany pieravažna na žyvapis, husty milenijałaŭ i pakaleńnia Z značna šyrejšyja i raznastajnyja. Jany aktyŭna kuplajuć skulpturu, dekaratyŭnaje mastactva, dyzajn i juvielirnyja vyraby.

Pakaleńnie Z asabliva vyłučajecca tym, što pryśviačaje značnuju častku svajho bahaćcia mastactvu (26% ad koštu ich aktyvaŭ). Jany taksama razhladajuć kalekcyjanavańnie nie jak čysta finansavuju inviestycyju, a jak sposab zachavańnia siamiejnaj i emacyjnaj spadčyny: 90% maładych kalekcyjanieraŭ pakaleńnia Z, jakija atrymali mastactva ŭ spadčynu, płanujuć jaho zachavać.

Akramia hetaha, apytańnie pakazała, što adbyvajecca revalucyja ŭ kanałach prodažu. Maładyja kalekcyjaniery mienš zaležać ad tradycyjnych aŭkcyjonnych damoŭ i halerej. Značna vyraśli pramyja pakupki ŭ mastakoŭ, jakija ciapier źjaŭlajucca druhim pa papularnaści kanałam.

63% apytanych kuplali pracy niepasredna ŭ aŭtaraŭ (praz studyi, sacyjalnyja sietki, takija jak instahram, abo praz kamisii), što śviedčyć pra pavieličeńnie apietytu da niepasrednaha ŭzajemadziejańnia z tvorcami i bolšuju prazrystaść rynku, jakaja farmirujecca maładymi pakupnikami.

U cełym, jak pakazali vyniki apytańnia, zamožnyja ludzi, jakija ŭdzielničali ŭ im, tracili ŭ siarednim 20% svajho bahaćcia na papaŭnieńnie ŭłasnych kalekcyj mastactva (u paraŭnańni z 15% u 2024 hodzie), u toj čas jak zamožnyja asoby z aktyvami bolš za 50 miljonaŭ dalaraŭ na hetyja mety vydatkoŭvali ŭ siarednim 28%. Na adnaho respandenta ŭ siarednim vydatki skłali 438 990 dalaraŭ, pryčym kalekcyjaniery kuplali ŭ siarednim 14 tvoraŭ.

Kamientary da artykuła