Na spatkańnie ŭ muziei Pietrusia Broŭki takaja čarha, što zapisacca možna tolki na sakavik 2027 hoda
Kali vy chočacie schadzić na spatkańnie ŭ muziej Pietrusia Broŭki, dyk šukajcie čałavieka, ź jakim atrymajecca prabyć u adnosinach jak minimum da viasny 2027 hoda. Bo raniej da vas čarha nie dojdzie!
Tut i dalej fota ź instahrama muzieja
Litaraturny muziej Pietrusia Broŭki znachodzicca ŭ domie Śviancyckaha na vulicy Karła Marksa, 30. Jaho pabudavali bolš za stahodździe tamu. U roznyja časy ŭ hetaj čatyrochpaviarchoŭcy žyli viadomyja palityčnyja dziejačy BSSR Mikałaj Haładzied, Pancielajmon Panamarenka, Alaksandr Čarviakoŭ, piśmieńnik Ciška Hartny. Narodny paet Piatruś Broŭka pasialiŭsia tut u 1951‑m i pražyŭ 29 hadoŭ. Paśla jahonaj śmierci ŭ kvatery tvorcy adčynili muziej. Heta, darečy, adziny muziej-kvatera ŭ Minsku.
Pravieści spatkańnie tut upieršyniu vyrašyli jašče ŭ 2017 hodzie. Tady heta była ŭsiaho tolki akcyja da Dnia ŭsich zakachanych. Na ramantyčnuju sustreču zaprasili paru, jakaja pieramahła ŭ śviatočnym konkursie. Ale ž niečakana vyśvietliłasia, što popyt na takuju pasłuhu šalony, tamu praź niekatory čas jaje zrabili pastajannaj.
Jak usio adbyvajecca? Muziej pracuje z aŭtorka da niadzieli da 19.00. Dva razy na tydzień paśla taho, jak dźviery začyniajucca dla zvyčajnych naviedvalnikaŭ, ich adkryvajuć dla zakachanych.
Dla pary ładziać ekskursiju pa muziei, raspaviadajuć šmat cikavaha. A paśla možna sieści za stolik la akna z šykoŭnym vidam, papić harbatu (niejki desiert dazvalajuć prynieści z saboj, a voś ałkahol pad zabaronaj) i parazmaŭlać.
Kaštuje pasłuha 80 rubloŭ. U sacyjalnych sietkach Litaraturnaha muzieja Pietrusia Broŭki paznačana, što samy rani termin, kali možna trapić na spatkańnie — sakavik 2027 hoda.
Darečy, nie kožnaje kachańnie vytrymlivaje takoje vyprabavańnie časam. Raspaviadajuć, što adna žančyna paśpieła razyścisia z mužam, pakul čakała pryznačanaj daty spatkańnia ŭ muziei. Ale ž dla jaje heta nie stała nahodaj admianiać zapis — u vyniku pajšła pić harbatu ź siabroŭkaj.
Čytajcie taksama:
Vystava da 120‑hodździa z dnia naradžeńnia Michasia Sieŭruka prachodzić u Minsku