«Łuŭr abrabavali siarod biełaha dnia. A mianie ŭ Biełarusi krama vyličyła za 7 chvilin pa bonusnaj kartcy»

Adna ź biełarusak padzialiłasia ŭ siecivie historyjaj ab tym, jak jaje pa kamierach i bonusnaj karcie vielmi chutka znajšli. Dopis vyklikaŭ dyskusiju: adny raschvalili zručnaść i biaśpieku, inšyja ž ubačyli ŭ hetym tryvožnyja prykmiety tatalnaha kantrolu.

Ilustracyjnaje fota: LookByMedia

Usio pačałosia ź iraničnaha dopisu ŭ Threads: «Śmiajusia! U Łuŭry siarod biełaha dnia źnikajuć kaštoŭnaści na 88 miljonaŭ jeŭra! Nichto nie moža znajści. U hety čas u Biełarusi. 7 chvilin tamu vyjšli z kramy Green, zvanok: «U nas u čałavieka nie prajšła apłata pa karcie, a my pa kamierach pahladzieli, vy vitalisia, možacie jamu patelefanavać, kab viarnuŭsia, kasir pieražyvaje». P.S. Jany nas vyličyli pa bonusnaj karcie».

Inšyja biełarusy pačali dzialicca padobnymi vypadkami. Adna žančyna raspaviała, jak bonusnaja karta kramy «Oma» vyratavała jaje ad straty bankaŭskaj kartki. Jana zabyła jaje na kasie i zaŭvažyła prapažu tolki kala mietro. Pakul jana źbirałasia błakavać kartku, joj patelefanavali sa słužby achovy kramy:

«Vas turbuje słužba achovy kramy «Oma». Kali łaska, viarniciesia za kartaj, vy zabylisia. Pryjdziecie — padydzicie na post achovy».

«Viarnułasia ŭ «Oma», padychodžu na post. (…) Pytaju: «A jak vy mianie tak chutka znajšli?» «Vy vykarystoŭvali bonusnuju kartu. Pa kamierach vyličyli i prahledzieli dziejańni, čas, kali kartu zabyli. Pa danych bonusnaj usie vašy danyja daviedalisia», — dzielicca žančyna.

Padobnyja historyi adbyvalisia i ŭ inšych kramach.

«Ja tak hrošy ŭ «Dziciačym śviecie» straciła, apłaciła adkładzienymi, dumała ŭ mašynie vypali. U mašynie nie akazałasia, vyrašyła viarnucca, a mianie ŭžo sustreli kansultanty, znajšli pa bonusnaj i kamierach. Było vielmi pryjemna», — dzielicca adna z karystalnic.

Inšaja zhadvaje: «Ja tak u «Oz» zabyłasia kartu na terminale, taksama vyličyli pa karcie źnižak. Pakul nie patelefanavali, ja navat nie viedała, što zhubiła kartu».

Jašče adzin vypadak, choć i ź inšym adcieńniem, adbyŭsia ŭ Skidzieli. Jak raskazała žančyna, kasir u kramie «Miła» pamyłkova daŭ joj reštu jak sa 100 rubloŭ, a nie z 50. Pakolki jaje siabroŭka vykarystała svaju bonusnuju kartu, dyrektar kramy chutka znajšoŭ jaje, paprasiŭ numar «vinavataj» i navat dasłaŭ videa z kamier u jakaści dokazu. Dziaŭčyna, viadoma, roźnicu viarnuła.

Ale nie ŭsie bačać u hetych historyjach tolki stanoŭčaje. Adzin z kamientataraŭ rezka vykazaŭsia:

«U vas ličbavy kancłahier. Čamu radujeciesia? Kali vas abrabujuć ci zhvałciać, to nie znojduć. Naiŭnyja ludzi, daliboh. Nie pieražyvajcie za francuzaŭ, u ich chapaje dabra. A ŭ vas tolki bonusnyja karty!»

Jašče adna davodzić: «Bonusnymi kartami nie karystajusia daŭno. Znajomuju zaprasili ŭ padatkovuju praz nabytaje ŭ praduktovaj kramie. Suma nabytaha pieravysiła aficyjnuju zarpłatu».

«Tamu ŭ mianie niama nivodnaj bonusnaj karty, tolki karta zapraŭki», — zaŭvažaje adna z žančyn. Adnak aŭtar treda zhadała pra vypadak, kali čałavieka znajšli i biez dapamohi bonusnaj karty:

«Maju siabroŭku paprasili viarnucca apłacić picu (nie prajšła apłata). Vyličyli pa numary mašyny praz DAI. Tak što ŭsio heta iluzija».

«Kolkaść kamier u Biełarusi adnaznačna pieravyšaje ich kolkaść u Francyi», — zaŭvažyŭ niechta.

«I mnie voś dla siabie da kanca nie zrazumieła, jak lepš», — dypłamatyčna adkazała aŭtar.

Kamientary da artykuła