Ekspart bienzinu ź Biełarusi ŭ Rasiju ŭ kastryčniku vyras u 30 razoŭ — pradajuć jaho daražej za rasijski

Biełaruś rezka pavialičyła pastaŭki bienzinu ŭ Rasiju na fonie ŭkrainskich napadaŭ pa rasijskich NPZ. Ekśpierty kažuć, što heta dapamahło stabilizavać rynak.

Ilustracyjnaje fota: LookByMedia

Biełaruś u kastryčniku rezka pavialičyła pastaŭki bienzinu ŭ Rasiju. Abjomy prodažu biełaruskaha bienzinu na Pieciarburhskaj biržy za 20 dzion kastryčnika vyraśli ŭ 31,7 raza ŭ paraŭnańni z kastryčnikam 2024 hoda — da 24,72 tysiačy ton.

Tolki 20 kastryčnika na biržy pradali bolš za tysiaču ton biełaruskaha bienzinu. A rekord byŭ pastaŭleny 15 kastryčnika, kali pradali 5,7 tysiačy ton, piša «Kommiersant».

Pry hetym rasijskija ekśpierty adznačajuć, što biełaruski bienzin daražej za rasijski. U tym liku z-za łahistyki i spadarožnych vydatkaŭ.

Rost prodažu biełaruskaha bienzinu na biržy ŭ kastryčniku źviazany sa źnižeńniem prapanovy rasijskaha paliva paśla ŭdałych ŭkrainskich atak na bujnyja NPZ u jeŭrapiejskaj častcy Rasii. U vyniku zavody rezka skaracili vytvorčaść, i ŭ krainie ŭźnik deficyt paliva.

U siaredzinie vieraśnia aptovyja abjomy prodažu bienzinu źnizilisia da minimalnych za apošnija dva hady značeńniaŭ, u pryvatnaści, prodažy AI-92 źnizilisia amal na čverć. U pačatku kastryčnika rasijski vice-premjer Alaksandr Novak prapanoŭvaŭ pavialičyć impart biełaruskaha bienzinu ŭ Rasiju da 300 tysiač ton u miesiac.

Jašče da hetaha, u vieraśni, Biełaruś rezka pavialičyła pastaŭki bienzinu pa čyhuncy. Bolš darahoje biełaruskaje paliva zakuplajuć, u tym liku, bujnyja naftavyja kampanii dla ŭłasnych AZS.

U Rasii spadziajucca, što zaležnaść rasijskaha rynku ad biełaruskich pastavak budzie źnižacca pa miery adnaŭleńnia mahutnaściaŭ ułasnych NPZ. Poŭnaje adnaŭleńnie, na dumku miascovych ekśpiertaŭ, moža raściahnucca na niekalki miesiacaŭ — až da siaredziny 2026 hoda. Adnak možna čakać, što efiektyŭnyja ŭkrainskija napady na paliŭna-enierhietyčny kompleks Rasii buduć praciahvacca.

Kamientary da artykuła