Prync Endru admoviŭsia ad tytuła hiercaha Jorkskaha. Jamu znoŭ vylezła bokam sprava Epštejna

Prync Endru, brat karala Vialikabrytanii Karła III, admoviŭsia ad tytułu hiercaha Jorkskaha i inšych karaleŭskich znakaŭ ušanavańnia paśla taho, jak jaho suviaź z asudžanym sieksualnym złačyncam Džefry Epštejnam znoŭ trapiła ŭ centr uvahi hramadskaści. Pra heta rašeńnie Endru abviaściŭ 17 kastryčnika, i jano było zroblena z dazvołu karala.

Prync Endru. Fota: Aaron Chown/Pool Photo via AP

U zajavie, raźmieščanaj na sajcie Bukinhiemskaha pałaca, prync Endru adznačyŭ, što pastajannyja abvinavačvańni suprać jaho «adciahvajuć uvahu ad pracy Jaho Vialikaści i karaleŭskaj siamji».

Prync padkreśliŭ, što kateharyčna admaŭlaje ŭsie abvinavačvańni, ale adčuvaje nieabchodnaść zrabić krok nazad i bolš nie karystacca svaim tytułami i znakami pašany.

Heta abviaščeńnie źjaviłasia pierad publikacyjaj paślaśmiarotnych uspaminaŭ Virdžynii Robierts Džufre, jakaja skončyła žyćcio samahubstvam u krasaviku. Džufre śćviardžała, što Epštejn vykarystaŭ jaje, kali joj było 17 hadoŭ, i što jana mieła seksualnyja kantakty z pryncym Endru. U 2021 hodzie jana padała na jaho ŭ sud, a ŭ 2022 hodzie sprava była ŭrehulavanaja za nieraskrytuju sumu.

U 2019 hodzie Endru ŭžo sutyknuŭsia z šyrokaj krytykaj za intervju Bi-bi-si, u jakim prync sprabavaŭ apraŭdacca, ale pry hetym nie vyhladała, što jon spačuvaje achviaram Epštejna. Praź niekalki dzion jon admoviŭsia ad svaich publičnych abaviazkaŭ u karaleŭskaj siamji.

Niahledziačy na toje, što prync admoviŭsia ad tytułu hiercaha Jorkskaha i inšych ušanavańniaŭ, pryncam jon zastajecca. Jahonaja byłaja žonka Sara Fierhiusan taksama pierastanie karystacca tytułam kniahini Jorkskaj, ale dočki Bieatrys i Judžynija praciahvajuć być pryncesami.

Kamientary da artykuła