Lavon Chałatran adkryŭ z kamandaj bistro-bar u Varšavie — čym buduć ździŭlać?

Fłet bred, polskaja mačanka, futurystyčnaja lustra ad biełaruskaha mastaka — Lavon Chałatran z kamandaj adkryli ŭ Varšavie novaje bistro-bar Antresolec.

Lavon Chałatran. Fota: asabisty archiŭ

Bistro pad nazvaj Antresolec, akramia adsyłki da viadomaha słova, abyhryvaje svajo raźmiaščeńnie na karcie horada — vulicu Solec, jakaja znachodzicca na adnym z samych tusovačnych učastkaŭ Varšavy niedaloka ad Visły.

Novy prajekt Lavona Chałatrana (kolišniaha kiraŭnika ruin-bara OK16 u Minsku i eks-palitviaźnia), partniora i šef-kuchara Uładzia i piaci inviestaraŭ abiacaje sučasnuju kuchniu z łakalnymi kampanientami.

«My chočam hatavać vielmi jakasnuju ježu, smačnuju, pa narmalnych cenach, biez ovier prajsu. Tak, u nas jość takija pazicyi jak fłet bred — heta amierykanskaja nievialikaja picula ź nietradycyjnymi dla picy načyńniami. Naprykład, midyjami ci kačkaj. Taksama ŭ nas budzie mačanka, ale polskaja — u ich heta burhier z tušanaj, rvanaj śvininaj. Płanujem pradavać polskija arhaničnyja viny i sidry», — raskazvaje Lavon.

Kielich vina ŭ bary abydziecca ŭ 20 złotych (16 BYN), a fłet bred budzie kaštavać kala 40 (32 BYN). U budni tut buduć padavać aŭtarskija abiedy, a ŭ vychodnyja zaprašajuć na śniadańni.

Lavon kaža, što jany z kamandaj doŭha abmiarkoŭvali, jak im lepš padavać svoj biełaruski emihrancki składnik, i pryjšli da vysnovy, što biełaruskaść piersanału i častki naviedvalnikaŭ i tak sfarmujuć patrebny duch.

«Deficytu dranikaŭ ci syrnikaŭ u Varšavie siońnia niama, tamu nam važniej być internacyjanalnym miescam. My nie admaŭlajem svajho emihranckaha pačatku, ale pakazvajem, što my całkam sabie dobra intehrujemsia ŭ polskaje hramadstva, bo žyviom tut usio ž nie pieršy hod».

Šmat fizičnaj pracy ŭ bistro rabiłasia svaimi rukami, na vałanciorskich pačatkach. U bar užo ŭkłali kala 45 tysiač dalaraŭ. Dyzajn interjeru ŭ im — sprava ruk biełaruskaha mastaka Sašy Adamava. Jon ža stvaryŭ futurystyčnuju fotahieničnuju lustru dla bistro.

Lustra ad mastaka Sašy Adamava. Fota: asabisty archiŭ surazmoŭcy

Jak Lavon budzie spałučać pracu ŭ bistro sa svaimi inšymi prajektami, naprykład, prastoraj dla imprez Kwatera 27?

«Bar dla mianie ŭ pryjarytecie. I nasamreč pieršapačatkova płanavaŭsia jon, a pa chodzie atrymałasia i prastora. Ale Kwatera 27 — kulturny, niekamiercyjny prajekt, jaki pakul ničoha nie zarablaje. Bistro ž adrazu płanavałasia kamiercyjnym».

Antresolec — nie pieršaje hastranamičnaje miesca, da jakoha ŭ Varšavie prykładvaje ruku Lavon. Amal adrazu paśla emihracyi ź Biełarusi jon zajmaŭsia baram BackDoor, ale syšoŭ adtul praz kanflikt ź inšym uładalnikam. Paśla dvuch hadoŭ isnavańnia BackDoor zakryŭsia. Lavon kaža, što ŭličyŭ papiaredni dośvied, tamu pierad adkryćciom bistro jany padrychtavali pahadnieńnie z praviłami pavodzinaŭ padčas niespadziavanych situacyj — jaho padpisali ŭsie členy kamandy.

View this post on Instagram

A post shared by Antresolec (@antresolec)

Kamientary da artykuła