Za apošnija 10 hadoŭ arendnyja staŭki vyraśli ŭdvaja. Za kolki ciapier zdajuć kvatery

Pahladzieli, pa jakich cenach ciapier možna zdymać kvateru ŭ Minsku i rehijonach.

Ilustracyjny zdymak. Fota: AP Photo/Pavel Bednyakov

Arendnyja staŭki bjuć rekordy

Dziesiać hadoŭ tamu staŭki na arendu kvater u Minsku byli našmat nižejšyja.

Siarednija ceny na arendu adnapakajoŭki vosieńniu 2016 hoda byli ŭ rajonie $220. Ciapier — kala $410, a za $220—250 prapanujuć kvatery ŭ novabudoŭlach z hołymi ścienami.

Fota: skrynšot z sajta realt.by

Dvuchpakajovyja kvatery 10 hadoŭ tamu ŭ siarednim zdavali za $300, a ciapier — za $565. Arenda troški kaštavała krychu nižej za $400, ciapier — kala $760.

Asabliva chutka staŭki vyraśli za apošni hod: u paraŭnańni z anałahičnym pieryjadam 2024‑ha rost skłaŭ kala 30%.

Minimalnyja ceny za apošnija 10 hadoŭ byli viasnoj 2016 hoda. Siarednija staŭki ŭ Minsku tady vyhladali tak:

• 1‑pakajovyja kvatery — $190;
• 2‑pakajovyja — $255;
• 3‑pakajovyja — $335.

Što kažuć sami arendadaŭcy i arandatary

Čytačy ź Minska, jakija jašče ŭ 2023 hodzie zdavali adnapakajovuju kvateru ŭ Novaj Baravoj za $370, ciapier majuć ź jaje $500.

«Pieršyja dva hady arandatarami byli siabry znajomych, canu dla ich my padniali tolki ŭ 2024‑m, dyj toje ŭsiaho da $400, ale ŭ pačatku hetaha hoda jany źjechali na svaju kvateru, tamu my znajšli novych kvatarantaŭ za $500 dalaraŭ, pryčym davoli chutka», — kaža surazmoŭca.

Minčuki kažuć, što pry žadańni mahli b lohka padniać staŭku da 550—600 dalaraŭ, ale nie robiać hetaha, bo płanujuć u chutkim časie pradavać kvateru.

«Ceny ciapier na piku, tamu treba paśpieć pazbavicca ad žylla ŭ Biełarusi, bo ćviorda vyrašyli, što chočam zastavacca žyć u Polščy i tut kuplać sabie nieruchomaść».

Siamja, jakaja šmat hadoŭ zdymaje dvuchpakajoŭku na praśpiekcie Haziety «Praŭda» ŭ staroj panelcy, pryhadvaje, što kali tolki zasialilisia tudy ŭ 2017-m, to płacili ŭsiaho $200:

«Kvatera sa ścipłym ramontam, tamu cana była nievysokaja. Za hety čas kaśmietyčny ramont rabili my sami, tamu haspadary padymali staŭki małymi krokami».

Ciapier para płacić za arendu $350 i kaža, što kali ludzi daviedvajucca pra staŭku, to nie vierać, što možna zdymać paŭnavartasnuju dvuchpakajoŭku za takija hrošy.

«Haspadary daŭno žyvuć za miažoj, u nas skłalisia dobryja adnosiny, plus my nie tolki spraŭna płacim i padtrymlivajem kvateru ŭ dobrym stanie, ale i zrabili jaje lepšaj, čym było ŭ 2017-m, tamu ŭdajecca płacić nižej za rynkavy košt», — kaža surazmoŭca.

Staŭki rastuć nie tolki ŭ Minsku

Čytač z Hrodna, jaki zdaje adnapakajoŭku płoščaj 43 kvadraty, kaža, što kali ŭ 2019‑m pačynaŭ zdavać za $130, to ciapier maje $270.

«Kvatera z dobrym ramontam i pierapłaniroŭkaj. Kuchnia asobnaja, a haścioŭnia abjadnanaja z kalidoram i maje vyharadžanuju častku, dzie staić dvuchspalny łožak. Pa sučasnych jeŭrapiejskich mierkach heta ledź nie dvuška», — kaža surazmoŭca. 

Mužčyna pryznajecca, što za hety čas paśla čarhovaha pavyšeńnia stavak niekatoryja arandatary vyrašali źjechać, ale na ich miesca biez prablem znachodzilisia novyja.

Spalny rajon Hrodna. Ilustracyjnaje fota: Naša Niva

Čałaviek, jaki zdaje łožki dla studentaŭ u Hrodnie, kaža, što apošnija hady padymaje staŭku na $10 z čałavieka.

«U 2023‑m było $70 plus kamunałka, u 2024‑m — $80, a sioleta ŭžo pa $90. U dvuchpakajovaj kvatery žyvie piać čałaviek: try ŭ vialikim pakoi i dva ŭ małym. Pry hetym, niahledziačy na pavyšeńnie cenaŭ, znajści achvotnych nieskładana, jość studenty, jakija žyvuć pa 2‑3 hady».

Haspadar kaža, što jamu vyhadniej zdavać kvateru studentam łožkami, čym prosta zdać jaje na doŭhi termin.

«Ramont stary, tamu bolš za $250—280 nichto za jaje nie daść. Kali ŭžo inviestavać u ramont, to budzie mieć sens zdavać na sutki, ale zajmacca hetym niama času».

Dla paraŭnańnia, u Minsku łožki zdajuć pryblizna pa $130—150 z čałavieka.

Čamu arenda tak chutka daražeje?

Na rost arendnych stavak upłyvajuć adrazu niekalki faktaraŭ.

Pa-pieršaje, raście dabrabyt nasielnictva. Kali pa stanie na žnivień 2024 hoda siaredniaja zarpłata ŭ Minsku była kala 2635 rubloŭ na ruki, to ŭ žniŭni 2025 hoda jana vyrasła da 3095 rubloŭ čystymi.

Biełaruski rubiel za hety čas taksama krychu ŭmacavaŭsia da dalara. U valutnym vymiareńni siaredniaja zarpłata vyrasła z $835 da $1040.

Akramia taho, zachoŭvajecca stabilny popyt na karotkaterminovuju arendu, bo turysty z Rasii praciahvajuć masava jechać u Biełaruś. Zbolšaha — u Minsk, Brest i Hrodna.

Ekśpierty rynku nieruchomaści taksama tłumačać rost siarednich cen na arendu kvater tym, što ŭ ekspłuatacyju ŭvodzicca ŭsio bolš śviežaha žylla z novym ramontam. Arenda ŭ takim žylli tradycyjna kaštuje daražej, čym u starych kvaterach.

Kamientary da artykuła