Vieterana-afhanca z Žyličaŭ asudzili na 12 hadoŭ za palityku, u tym liku za zdradu dziaržavie

U Afhanistanie Siarhieju Cimašenka słužyŭ u elitnaj desantna-šturmavoj častcy. Ciapier jon za kratami — padobna, što za padtrymku Ukrainy.

Siarhiej Cimašenka. Fota ź jahonaj staronki ŭ Adnakłaśnikach

Siarhieju Cimašenka 59 hadoŭ. Jon z Žyličaŭ, ahraharadka ŭ Kiraŭskim rajonie Mahiloŭskaj vobłaści, viadomaha pałacam Ihnata Bułhaka. Adsiul byŭ rodam i pravaabaronca Aleh Hułak, jaki pamior u 2022-m.

Siarhiej Cimašenka z 1986 pa 1988 hady vajavaŭ u Afhanistanie. Jon słužyŭ u 2‑j desantna-šturmavoj zastavie Kierkinskaj desantna-šturmavoj manieŭranaj hrupy, kiravaŭ bajavoj hrupaj.

Udzielničaŭ u šmatlikich bajavych apieracyjach. Za ŭdzieł u apieracyi «Młyn» kala kišłaka Bała-Bokan byŭ uznaharodžany ordenam Čyrvonaj zorki.

Siarhiej Cimašenka (z pravaha boku) razam z namieśnikam kiraŭnika DŠZ Viktaram Palikam. Fota sa staronki Siarhieja ŭ Adnakłaśnikach

Apošni čas mužčyna zajmaŭsia vyrabami z dreva — doškami i inšymi budaŭničymi materyjałami.

Siarhiej Cimašenka, miarkujučy pa sacsietkach, padtrymlivaje Ukrainu ŭ vajnie suprać Rasii. Padobna, što heta i stała pryčynaj abvinavačańniaŭ. Jon raptoŭna źnik z usich sacsietak u kancy 2024 hoda, byŭ aryštavany i źmieščany ŭ SIZA.

Pa źviestkach pravaabaroncaŭ, Siarhieja Cimašenku asudzili 10 vieraśnia 2025 hoda pa čatyroch artykułach — «udzieł u pratestach» (č. 1 art. 342 KK), «zdrada dziaržavie» (art. 356 KK), «udzieł u ekstremisckim farmiravańni» (č. 3 art. 361‑1 KK) i «ŭdzieł u terarystyčnaj arhanizacyi» (č. 2 art. 290‑5 KK). Prysud — 12 hadoŭ kałonii.

Kamientary da artykuła