NATA paabiacała vykarystoŭvać dla abarony ad Rasii ŭsie srodki

Pavodle paviedamleńnia aljansu, za apošnija paŭtary tydni rasijskija drony i źniščalniki niekalki razoŭ parušali pavietranuju prastoru troch krain NATA. U adkaz u Bruseli zajavili, što Maskva demanstruje «ŭsio bolš biezadkaznyja pavodziny», jakija mohuć pryvieści da eskałacyi i pahrozy žyćciu ludziej.

Fota: AP Photo / Geert Vanden Wijngaert

Hienieralny sakratar NATA Mark Rute i novy pradstaŭnik ZŠA ŭ Radzie Biaśpieki AAN Majk Uołc padkreślili: aljans budzie abaraniać «kožny dziujm» svajoj terytoryi i vykarystaje dla hetaha ŭsie nieabchodnyja vajskovyja i nievajskovyja instrumienty.

Na hetym fonie pradstaŭniki ŭładaŭ Polščy, Litvy, Čechii i Hiermanii zajavili pra hatoŭnaść źbivać lubyja rasijskija abjekty, što ŭvarvucca ŭ ich pavietranuju prastoru. Siem krain ES na ŭschodnim fłanhu NATA abmiarkoŭvajuć ideju pabudovy «ściany ad dronaŭ» na miažy z Rasijaj.

U Danii, dzie 22 vieraśnia byli zafiksavanyja nieviadomyja bieśpiłotniki, daviałosia zakryć aeraporty. Premjer-ministr Miete Frederyksien nazvała heta surjoznaj atakaj na krytyčnuju infrastrukturu i dapuściła, što za joj moža stajać Maskva.

Užo dvojčy za apošnija dni krainy NATA sklikali kansultacyi pa artykule 4 statuta, jaki prymianiajecca pry pahrozie terytaryjalnaj cełasnaści abo biaśpiecy sajuźnikaŭ. Heta vielmi redkaja pracedura — za ŭsiu historyju NATA jaje vykarystoŭvali tolki dzieviać razoŭ, ź ich try — padčas vajny va Ukrainie.

«Rasija pavinna terminova spynić niebiaśpiečnyja pavodziny, — zajaviŭ Majk Uołc u pieršym publičnym vystupleńni paśla pryznačeńnia ŭ piatnicu pastajannym pradstaŭnikom ZŠA ŭ Radzie Biaśpieki AAN. — Złučanyja Štaty stajać na baku našych sajuźnikaŭ pa NATA… i buduć abaraniać kožny dziujm terytoryi NATA».

Kamientary da artykuła