Tramp zajaviŭ, što Pucin jaho padvioŭ svaim niežadańniem zaviaršać vajnu
Prezident ZŠA Donald Tramp zajaviŭ, što nie zmoh da hetaha času zaviaršyć rasijska-ŭkrainskuju vajnu, bo jaho padvioŭ prezident Rasii Uładzimir Pucin.
Donald Tramp. Fota: Kevin Dietsch/Getty Images
«ZŠA ŭrehulavali siem [vojnaŭ]. Ja dumaŭ, što hetaja — samy prosty varyjant [dla ŭrehulavańnia] praz maje stasunki z prezidentam Pucinym. Ale jon mianie padvioŭ. Jon mianie sapraŭdy padvioŭ», — skazaŭ Tramp na supolnaj pres-kanfierencyi z premjer-ministram Vialikabrytanii Kiram Starmieram u Łondanie.
Pry hetym prezident ZŠA adznačyŭ, što nie ličyć pamyłkaj sustreču z Pucinym na Alascy.
Taksama Tramp vykazaŭ upeŭnienaść, što kali ceny na naftu buduć źnižacca, Pucinu ŭ chutkim časie daviadziecca spynić bajavyja dziejańni.
«Jon [Pucin] zabivaje šmat ludziej, i jon hublaje bolš ludziej, čym zabivaje, ščyra kažučy, rasijskich sałdat zabivajuć čaściej, čym ukrainskich», — padkreśliŭ prezident ZŠA.
Jon taksama vykazaŭ mierkavańnie, što rasijskaja-ŭkrainskaja vajna mahła pieraraści ŭ Treciuju suśvietnuju, i paŭtaryŭ, što Rasija nie ŭvarvałasia b va Ukrainu ŭ 2022 hodzie, kali b jon byŭ prezidentam.
Sa svajho boku, Kir Starmier zaklikaŭ Trampa supolna cisnuć na Pucina.
Čytajcie taksama:
«Tyranija znoŭ pahražaje Jeŭropie». U Łondanie adbyŭsia bankiet u honar Donalda Trampa
Tramp vystaŭlaje Jeŭrasajuzu ŭmovy, jakija toj nie moža vykanać