U Stolinie da jubileju horada adkryli skvier biez travy i drevaŭ, ale ź mietaličnym stałom
Sioleta horad adznačaje 470‑hodździe z momantu pieršaha piśmovaha ŭspaminu. Kiraŭnictva rajona vyrašyła adznačyć jubilej, zrabiŭšy vielmi sumnieŭny padarunak haradžanam.
Čorny mietaličny stoł i kresły pasiarod skviera biez travy i drevaŭ. Śpinki kresłaŭ vyšejšyja za vysadžanyja kvołyja dubcy. Fota: telehram kanał «Stolinski rajon».
Adkryćcio skviera 470‑hodździa Stolina pa vulicy Cieraškovaj było prymierkavana da tak zvanaha Dnia narodnaha adzinstva, jaki adznačajecca 17 vieraśnia.
Skvier adkryvali ŭ aŭralnym režymie, byccam nichto nie byŭ hatovy da jubileju horada i jon niečakana zvaliŭsia na hałovy čynoŭnikam. Za dzień da adkryćcia, 16 vieraśnia, na terytoryi budučaha skviera jašče va ŭsiu pracavali ludzi, zasypajučy i raŭniajučy hrunt i vysadžvajučy pad mietr sadžancy.
Za dzień da aficyjnaha adkryćcia skviera jašče va ŭsiu išło budaŭnictva. Fota: telehram kanał «Stolinski rajon».
Na nastupny dzień skvier adkryvali ŭ zavieršanym vyhladzie: bieź jakich-niebudź prykmiet travy, jakaja nie mahła praraści za noč, i biez dreŭ, zamiest jakich vysadzili kvołyja nizieńkija dubcy.
Pa centry skviera placoŭka z šeraj bietonnaj plitki, da jakoj z roznych bakoŭ padychodziać roŭnyja darožki. Uzdoŭž darožak rasstaŭleny abaviazkovy atrybut biełaruskaha dobraŭparadkavańnia — kavanyja łavy sa śmietnicami.
Mietaličny karavaj na mietaličnym ručniku. Fota: telehram kanał «Stolinski rajon».
Hałoŭnym akcentam skviera staŭ čorny mietaličny stoł z amal dziasiatkam takich ža čornych mietaličnych kresłaŭ. Stoł nakryty čornym mietaličnym ručnikom, na jakim staić mietaličny karavaj — hetaja kampazicyja, vidać, musiła raskazać pra haścinnaść kraju.
Pamiatny kamień pobač ź miescam, dzie była zakładziena kapsuła času. Fota: telehram kanał «Stolinski rajon».
Šylda na pamiatnym kamieni z vyjavaj Mańkavickaj siadziby. Fota: telehram kanał «Stolinski rajon».
«Tut razam złučylisia historyja, kultura i tradycyi palešukoŭ. Heta historyja horada, pamiać ab Vialikaj Pieramozie, lehiendy pra pachodžańnie nazvy, a taksama vobraz našych ludziej — pracavitych, haścinnych i tych, chto dbaje pra budučyniu horada», — patłumačyŭ kancepcyju na adkryćci skviera staršynia Stolinskaha rajvykankama Alaksandr Pačko.
Mietaličny ručnik maje vostryja niebiaśpiečnyja vuhły. Fota: telehram kanał «Stolinski rajon».
Mietaličny ručnik, jaki źvisaje sa stała, maje vostryja vuhły, jakimi možna razadrać adzieńnie i nohi — pra takija «drobiazi» aŭtary jaŭna nie zadumvalisia.
Akramia hetaha ŭ skviery zakładziena kapsuła času i pastaŭleny vialiki kamień z šyldaj pra zakładku skviera. Šylda ŭpryhožana vyjavaj źniščanaha ŭ vajnu pałaca Radziviłaŭ u susiednich Mańkavičach.
Kamień z płanam horada. Fota: telehram kanał «Stolinski rajon».
Pad nohi pakłali vialiki kruhły znak z čornaha kamieniu, ź jakoha ciapier paŭsiul robiać nadmahilli, na jakim vyhraviravany płan horada ź jaho słavutaściami, hierb horada, ujazny znak i viečny ahoń.
Varta adznačyć, što ŭsie nadpisy vykanany pa-biełarusku i navat biez pamyłak, ale heta nie ratuje skvier.