U šatłandskim lesie «afrykanskaje plemia» stvaryła ŭłasnaje karaleŭstva

Try čałavieki — Kofi Ofe z Hany (36 hadoŭ), jaki nazyvaje siabie karalom Atecheche, jahonaja žonka Žan Hašo ź Zimbabve (42 hady), jakaja abviaščaje siabie karalevaj Nandzi, i ich spadarožnica z Techasa Kaura Tejłar (pad imiem Asnat) — ź viasny žyvuć u vakolicach šatłandskaha horada Džedbaro. Heta samazvanaje «afrykanskaje plemia» nazyvaje siabie «Karaleŭstvam Kubała», paviedamlaje Bi-bi-si.

Fota: PA Media

Spačatku hetyja ludzi pastavili łahier na ŭzhorku nad horadam, ale paśla sudovaha rašeńnia ŭ lipieni byli adtul vysielenyja. Paśla taho jany pierabralisia ŭ pryvatny les kala pramysłovaj zony. Uładalniki ziamli praz sud damahlisia ich evakuacyi, i ŭ aŭtorak ranicaj hrupu pabudzili sudovyja vykanaŭcy razam z palicyjaj. Ichnija namioty razabrali, rečy sabrali.

Fota: PA Media

Adnak «plemia» paśla taho tolki pieraniesła łahier litaralna praz aharodžu, usiaho za niekalki mietraŭ ad papiaredniaha miesca. Vyśvietliłasia, što hetaja terytoryja naležyć miascovaj radzie, jakaja ŭžo padała novy pazoŭ u sud, kab vysielić parušalnikaŭ i adtul.

Členy hrupy śćviardžajuć, što takim čynam jany viartajuć ziamlu, nibyta adabranuju ŭ ichnich prodkaŭ 400 hadoŭ tamu, i abviaščajuć stvareńnie «Karaleŭstva Kubała». Miascovyja ŭłady na heta adkazvajuć, što jany parušajuć zakon, bo samavolna zaniali čužuju ziamlu.

Fota: PA Media

Hrupa aktyŭna viadzie staronki ŭ sacsietkach, maje bolš za 100 tysiač padpisčykaŭ u tyktoku i fejsbuku, pryciahvajučy da siabie ŭvahu.

Namieśnik kiraŭnika miascovaj rady Skot Chamiłtan zajaviŭ, što jany nie raz prapanoŭvali hrupie dapamohu, ale «plemia» ihnaruje ŭsie sproby dyjałohu. Tamu miascovyja ŭłady nie mohuć «siadzieć skłaŭšy ruki i dazvalać im parušać zakon».

Kamientary da artykuła