U APIEK+ dumajuć jašče raz pavialičyć zdabyču nafty

Krainy APIEK+ płanujuć jašče raz pavialičyć zdabyču nafty, paviedamili Reuters dva čałavieki, źviazanyja z chodam abmierkavańnia. Paśla hetaj naviny košt Brent na biržy ŭ sieradu ŭpała bolš čym na 2%. Ekśpierty dapuskajuć, što da kanca hoda na suśvietnym rynku budzie naziracca jaje vialiki lišak.

Zdymak ilustracyjny. Fota: freepik.com

Kartel i jaho partniory abmiarkoŭvajuć mahčymaść dalejšaha rostu zdabyčy ŭ kastryčniku. Siesiju dla pryniaćcia rašeńnia pryznačyli na niadzielu. Raniej jany ŭžo pavialičyli kvoty na 2,2 miljona barelaŭ u dzień u pieryjad z krasavika pa vierasień. Heta dazvolić viarnuć na rynak naftu, jakuju APIEK+ raniej zabraŭ dla padtrymki cenaŭ.

Akramia taho, zdabyča raście ŭ krainach, što nie ŭvachodziać u kartel. Mižnarodnaje enierhietyčnaje ahienctva prahnazuje vialiki lišak nafty ŭ 2025 hodzie — kala 2 miljonaŭ barelaŭ u dzień, i jon budzie pavialičvacca bližej da kanca hoda. Pa prahnozach, u hetym hodzie prapanova vyraście na 2,5 miljona barelaŭ u dzień, a popyt — tolki na 0,68 miljona.

Košt nafty, jaki ŭ aŭtorak dasiahnuŭ maksimumu za apošni miesiac, paśla naviny pra płany APIEK+ źniziŭsia na 2,1% da $67,72 za barel, ale potym častkova adnaviŭsia da $68,2. Z pačatku hoda Brent padaražeŭ prykładna na 9%.

Realna na rynak moža pastupić mienš nafty, čym płanujecca, bo niekatoryja krainy skaračajuć zdabyču, kab kampiensavać raniejšuju pieravytvorčaść, a inšyja abmiežavanyja technična. Adnak u žniŭni krainy APIEK pavialičyli zdabyču prykładna na zapłanavanyja 400 000 barelaŭ u dzień, pry hetym bolš za pałovu rostu zabiaśpiečyła Saudaŭskaja Aravija.

Kamientary da artykuła