Maleńkaj krainie pašancavała z nazvaj. Jak vostraŭ u Karybskim mory zarablaje miljony na damiennym imieni
U 1980-ja hady, kali tolki pačynaŭsia internet, kožnaja kraina atrymała svoj damien vierchniaha ŭzroŭniu: ZŠA —.us, Vialikabrytanija —.uk, a nievialikaj terytoryi Anhilja ŭ Karybskim mory dastałosia pašyreńnie .ai. Tady heta vyhladała jak vypadkovaść, ale ciapier, kali va ŭsim śviecie burna raźvivajecca štučny intelekt (AI), heta stała sapraŭdnaj załatoj žyłaj, piša Bi-bi-si.
Anhilja — brytanskaja zamorskaja terytoryja, viadomaja svaimi čystymi plažami. Fota: Wikimedia Commons
Ciapier tysiačy kampanij i pryvatnych asob kuplajuć va ŭładaŭ Anhilji damieny z kančatkam .ai. Tak, amierykanski pradprymalnik Dcharmieš Šach niadaŭna zapłaciŭ kala 700 tysiač dołaraŭ za adras you.ai. Usiaho za niekalki hadoŭ kolkaść zarehistravanych .ai-sajtaŭ pavialičyłasia ź mienš čym 50 tysiač da bolš čym 850 tysiač.
U 2024 hodzie prodaž takich adrasoŭ prynios Anhilji 39 miljonaŭ dalaraŭ ZŠA — heta amal čverć usich biudžetnych dachodaŭ. U 2025 hodzie ŭłady čakajuć rost dachodaŭ ad damienaŭ da 132 miljonaŭ uschodniekarybskich dalaraŭ (kala 48,9 miljona dalaraŭ ZŠA), a ŭ 2026-m — da 138 miljonaŭ (51,1 miljona). Dla paraŭnańnia: turyzm, jaki ličycca asnoŭnaj halinoj ekanomiki vostrava, daje kala 37% biudžetnych pastupleńniaŭ, ale mocna cierpić ad štohadovych urahanaŭ.
Zvyčajny košt rehistracyi .ai-damiena pačynajecca ad 150—200 dołaraŭ na dva hady. Pry hetym najbolš zapatrabavanyja adrasy pradajucca z aŭkcyjonaŭ za sotni tysiač dalaraŭ. Naprykład, niadaŭna damien cloud.ai abyšoŭsia ŭ 600 tysiač, a law.ai — u 350 tysiač.
Amal usie hrošy iduć u biudžet Anhilji, choć kala 10% prybytku atrymlivaje amierykanskaja kampanija Identity Digital, jakaja kiruje techničnym bokam damiena.
Hetaja situacyja nahadvaje prykład vostrava Tuvału, jaki jašče ŭ 1998 hodzie pradaŭ prava na svoj damien .tv i zarablaje na hetym miljony. Ale ŭ vypadku Anhilji vialikaja častka dachodaŭ idzie niepasredna miascovym uładam.
Hrošy ad damienaŭ płanujuć vykarystoŭvać dla raźvićcia infrastruktury, budaŭnictva novaha aeraporta i ŭmacavańnia sistemy achovy zdaroŭja.
Čytajcie taksama:
Adna ź dziaržaŭ rychtujecca da pieršaj u śviecie płanavanaj mihracyi ŭsioj nacyi
Čamu turbulentnaść pry palotach na samalotach zdarajecca ŭsio čaściej
Vialikabrytanija paśla šmathadovych sprečak pahadziłasia pieradać Maŭrykiju astravy Čahas