Što za hatel, u jakim spyniaŭsia Pucin u Kitai i kudy zaprašaŭ Łukašenku

Padčas vizitu ŭ Kitaj na samit ŠAS Pucin spyniŭsia ŭ piacizorkavym hateli Ritz-Carlton, jaki znachodzicca ŭ horadzie Ciańczin. Jak pisaŭ «Kamiersant», tam ža čakałasia jaho sustreča z Alaksandram Łukašenkam. «Znajšli ž dzie adasobicca», — pairanizavaŭ letapisiec Pucina Andrej Kaleśnikaŭ.

Uładzimir Pucin padčas pasiadžeńnia Rady kiraŭnikoŭ dziaržaŭ-udzielnic Šanchajskaj arhanizacyi supracoŭnictva. 1 vieraśnia 2025 hoda. Fota: Sergei Bobylev, Sputnik, Kremlin Pool Photo via AP

Pakazvajem, jak vyhladaje prezidencki numar u hetym hateli i kolki kaštuje.

Ritz-Carlton znachodzicca ŭ centry horada-spadarožnika Piekina — 13-miljonnym Ciańczinie niepadalok ad čyhunačnaha vakzała i hałoŭnych administracyjnych kvartałaŭ. Adsiul kala paŭhadziny jazdy da mižnarodnaha aeraporta Ciańcziń Bińchaj.

Unutrany dvor hatela. Fota: ritzcarlton.com

Hatel uvachodzić u mižnarodnuju sietku haścinic kłasa «luks», jakaja znachodzicca va ŭłasnaści Ritz-Carlton Hotel Company, daččynaj kampanii najbujniejšaha ŭ śviecie haściničnaha chołdynhu Marriott International.

Hatel u Ciańczinie adkryŭsia ŭ 2013 hodzie jak častka prajekta «Piać unutranych dvorykaŭ na vulicy Tajań». Jaho asnoŭny budynak vykanany ŭ nieakłasičnym styli.

Ritz-Carlton pazicyjanuje siabie jak etałon elehantnaści dla padarožnikaŭ z usiaho śvietu. Hości mohuć skarystacca tranśfieram na aŭtamabilach Rolls Royce ci Bentley.

Dla haściej jość niekalki restaranaŭ z kitajskaj, italjanskaj i japonskaj kuchniaj, a taksama kryty basiejn, fitnes-centr i vialikaja kanfierenc-zała płoščaj 1,6 tysiačy kvadratnych mietraŭ, što dazvalaje pravodzić sustrečy i vystavy.

Fota: ritzcarlton.com

U hateli adzin prezidencki numar, jaki maje kala 410 kvadratnych mietraŭ i ŭklučaje adnu spalniu ź vialikim łožkam farmatu king-size.

Jość i šyrokaja prastora dla pryjomu haściej.

Spalnia. Fota: ritzcarlton.com

U numary niekalki roznych zon: jość nievialikaja stałovaja zona ŭ ahulnaj prastory dla paŭsiadzionnaha karystańnia, asobnaja vialikaja stałovaja dla aficyjnych abiedaŭ, a taksama asobnaja haścioŭnia z kaminam.

Haścioŭnia z kaminam. Fota: ritzcarlton.com

Dadatkova vydzieleny biblijateka i rabočy kabiniet, a taksama prastornaja harderobnaja. Žyłaja i spalnaja častki adździeleny pieraharodkaj, što dazvalaje zachoŭvać pryvatnaść.

Biblijateka i rabočy kabiniet. Fota: ritzcarlton.com

Hałoŭny vanny pakoj azdobleny marmuram. U im akramia vanny i dušavoj kabinki znachodzicca džakuzi na dvaich. U numary jość dadatkovy sanvuzieł.

Vanny pakoj. Fota: ritzcarlton.com

Dla zručnaści haściej praduhledžany biaspłatny biespravadny internet, kava-mašyna i prybor dla pryhatavańnia harbaty.

Jak vynikaje z apisańnia numara, u im jość hadzińnik z budzilnikam premium-kłasa ad brenda Bang & Olufsen, siejf (za dadatkovuju płatu), vialiki stoł, za jakim mohuć raźmiaścicca vosiem čałaviek. Z voknaŭ numara adkryvajecca vid na sad.

Fota: ritzcarlton.com

Sutki pražyvańnia ŭ takim numary dla adnaho čałavieka kaštujuć prykładna 6800 dalaraŭ.

Kamientary da artykuła