Prodažy «Tesły» ŭ Jeŭropie katastrafična ŭpali. I vinavaty ŭ hetym kitajcy

U lipieni jeŭrapiejcy kupili elektramabilaŭ kampanii Iłona Maska na 40% mienš, čym letaś. Zatoje prodažy kitajskaha BYD uźlacieli bolš čym utraja.

Naviedvalniki ahladajuć Model Y na vystavie Everything Electric u Łondanie, krasavik 2025 hoda. Navat abnoŭlenaja madel nie zmahła ŭratavać Tesla ad abvału prodažaŭ u Jeŭropie. Fota: John Keeble / Getty Images

Jak piša The Guardian, niahledziačy na niadaŭniuju madernizacyju Model Y, biznes elektramabilaŭ, jakim kiruje Iłon Mask, praciahvaje sastupać pazicyi kitajskim kankurentam.

Pavodle danych Jeŭrapiejskaj asacyjacyi vytvorcaŭ aŭtamabilaŭ (ACEA), u krainach ES, Jeŭrapiejskaj asacyjacyi svabodnaha handlu i Vialikabrytanii było pradadziena 8 837 aŭtamabilaŭ Tesla. Hod nazad hety pakazčyk składaŭ 14 769 adzinak. Dla kampanii Iłona Maska heta ŭžo nie pieršy sihnał: rynak Jeŭropy stanovicca ŭsio bolš składanym.

Na hetym fonie kitajski vytvorca BYD demanstruje imklivy rost. U lipieni ŭ Jeŭropie kolkaść zarehistravanych aŭtamabilaŭ hetaj marki vyrasła da 13503 u paraŭnańni z 4151 hod nazad. U vyniku dola BYD dasiahnuła 1,2% jeŭrapiejskaha rynku, u toj čas jak u Tesla jana źniziłasia da 0,8%.

Viasnoj hetaha hoda BYD užo ŭpieršyniu abyšoŭ Tesla pa prodažach u Jeŭropie, i ciapierašnija vyniki pakazvajuć: heta nie adnarazovaja padzieja, a tendencyja. Asnoŭnaja pieravaha kitajskaha brenda — bolš dastupny košt madelaŭ, što robić ich pryvabnymi dla šyrokaha koła pakupnikoŭ.

Rost BYD adlustroŭvaje ahulnuju tendencyju: kitajskija aŭtavytvorcy aktyŭna vychodziać na jeŭrapiejski rynak, prapanoŭvajučy madeli ŭ siarednim i biudžetnym siehmientach. Heta stanovicca surjoznym vyklikam dla jeŭrapiejskich i amierykanskich kampanij, jakija daŭno trymali vierch pieravažna ŭ premijalnym siehmiencie. Ciapier ža kankurencyja ŭsio bolš adbyvajecca nie tolki ŭ technałohijach, ale i ŭ košcie.

Madel Atto 3 na Mižnarodnym aŭtamabilnym sałonie ŭ Barsiełonie. Fota: Getty Images

Jeŭrapiejskija ŭrady sprabujuć padšturchnuć popyt. U Vialikabrytanii niadaŭna zapracavała novaja prahrama subsidyj na nabyćcio 28 madelaŭ elektramabilaŭ, ale kitajskich siarod ich niama. Umova adna — košt aŭto nie pavinien pieravyšać 37 000 funtaŭ sterlinhaŭ.

Niahledziačy na takija zachady, bolš papularnymi ŭ paraŭnańni z elektramabilami zastajucca hibrydy. U toj čas, jak za siem miesiacaŭ 2025 hoda ŭ ES było zarehistravana bolš za 1 miljon novych elektramabilaŭ, što składaje 15,6% usiaho rynku, kolkaść hibrydnych madelaŭ skała bolš za 2,2 miljona. Asabliva mocny rost pakazali Francyja (+30,5%), Ispanija (+30,2%), Hiermanija (+10,7%) i Italija (+9,4%).

Jak padkreśliła kiraŭnica ACEA Sihryd de Vrys, kab elektramabili stali masavymi, Jeŭropie nieabchodna chutčej pašyrać sietku zaradnych stancyj, źnižać košt zaradki i stvarać skaardynavanyja prahramy padtrymki pakupnikoŭ.

Kamientary da artykuła