Paśla kanfliktu ź Zialenskim Vens zvaniŭ Załužnamu. Toj nie ŭziaŭ trubku

Pavodle infarmacyi vydańnia The Guardian, paśla vostraj sprečki pamiž prezidentam Ukrainy Uładzimiram Zialenskim i prezidentam ZŠA Donaldam Trampam u Avalnym kabiniecie 28 lutaha 2025 hoda vice-prezident ZŠA Džej Dzi Vens sprabavaŭ patelefanavać byłomu hałoŭnakamandujučamu USU, a ciapier pasłu Ukrainy ŭ Vialikabrytanii Valeryju Załužnamu, ale hienierał nie adkazaŭ.

Valeryj Załužny. Fota: AP Photo / Alberto Pezzali

Paviedamlajecca, što kamanda Džej Dzi Vensa praź niekalki dzion paśla kanfliktu ŭ Biełym doma, pryblizna 3 sakavika, źviarnułasia ŭ pasolstva Ukrainy ŭ Vialikabrytanii z prośbaj arhanizavać razmovu z Załužnym. Hienierał, adnak, uzhadniŭ heta pytańnie z Ofisam Zialenskaha i admoviŭsia ad kantaktu.

Stała viadoma taksama, što da Załužnaha paśla jaho pryznačeńnia pasłom u Łondanie źviartalisia nie tolki Vens, ale i inšyja palityki, biznesmieny dy aktyvisty.

Jamu navat prapanoŭvaŭ supracoŭnictva Poł Manafort — viadomy kiraŭnik vybarčaj kampanii Trampa ŭ 2016 hodzie, jaki apynuŭsia ŭ centry skandału praź vialikija vypłaty ad byłoha prezidenta Ukrainy Viktara Janukoviča. Załužny i hetuju prapanovu adchiliŭ.

Paśla kanfliktu ŭ Vašynhtonie hienierał daŭ zrazumieć, što nie budzie supracoŭničać z kamandaj Trampa suprać ukrainskaha prezidenta. Naadvarot, jon asabista sustreŭ Zialenskaha ŭ łondanskim aeraporcie i vykłaŭ u telehramie sumiesnaje fota z podpisam: «Budzie ciažka, ale razam my ŭsio pieraadolejem».

Niekatoryja prychilniki hienierała nie zrazumieli takoha kroku. Ale heta pakazała pazicyju Załužnaha: niahledziačy na roznahałośsi z prezidentam Ukrainy, u krytyčny momant, kali ich radzimu publična prynizili, jany pavinny być razam, bo kraina pieražyvaje vyprabavańni.

Kamientary da artykuła