Ukraincy paviedamili pra vyzvaleńnie čatyroch sioł na Danieččynie

Hałoŭnaje ŭpraŭleńnie raźviedki Ukrainy paviedamiła, što razam z padraździaleńniami Treciaj šturmavoj bryhady vyzvaliła siało Novamichajłaŭka ŭ Danieckaj vobłaści, na Limanskim napramku, piša «Ukrainskaja praŭda».

Novamichajłaŭka na Limanskim kirunku. Fota: Deepstatemap

Apieracyju praviali siły Departamienta aktyŭnych dziejańniaŭ HUR, u tym liku śpiecpadraździaleńnie «Artan», a taksama 2-hi šturmavy bataljon Treciaj šturmavoj bryhady. Ukrainskija vajskoŭcy niečakana dla voraha vybili z nasielenaha punkta rasijskija vojski i viarnuli nad im kantrol.

Pavodle pierachoplenaj infarmacyi, apieracyja stała dla akupantaŭ poŭnaj niečakanaściu: praciŭnik straciŭ kala roty asabovaha składu i byŭ vymušany pierakidać reziervy ź inšych učastkaŭ frontu.

Dziakujučy ŭzhodnienym dziejańniam raźviedki, šturmavikoŭ, vykarystańniu ciažkaj techniki i bieśpiłotnikaŭ ukrainskija siły palepšyli svajo taktyčnaje stanovišča i ŭzmacnili abaronu na hetym napramku.

Na hety momant, jak paviedamlajecca, Novamichajłaŭka całkam ačyščanaja ad rasijskich vojskaŭ i znachodzicca pad poŭnym kantrolem ukrainskaj armii. Nad siałom znoŭ uźniaty dziaržaŭnyja ściahi.

HUR taksama apublikavała videazapis apieracyi.

Raniej 24 žniŭnia hałoŭnakamandujučy USU Alaksandr Syrski paviedamiŭ pra vyzvaleńnie jašče niekalkich nasielenych punktaŭ na Danieččynie — siołaŭ Zialony Haj, Michajłaŭka i Uładzimiraŭka.

Kamientary da artykuła