Maładoj dziaŭčynie z Baranavič prysudzili kałoniju za ŭdzieł u rajonnym čacie. Jaje telehram byŭ nieabaronienym

Małaliki i nieaktyŭny čat, u jakim pisała Volha Nikałajeva, abviaścili «ekstremisckim farmiravańniem».

Volha Nikałajeva. Fota ź jaje staronki Ukantakcie

Volzie Nikałajevaj 32 hady. Jana z Baranavičaŭ. Paśla vučoby va ŭniviersitecie ŭ Minsku viarnułasia ŭ rodny horad. U dziaŭčyny jość muž i družnaja siamja.

Dziaŭčyna zajmałasia muzykaj i raniej była bubnačkaj u amatarskich muzyčnych hurtach. Siamjoj jany padarožničajuć pa Biełarusi i inšych krainach.

Volha Nikałajeva padčas spłavu na bajdarkach uletku 2024 hoda. Fota ź jaje instahrama

Volhu Nikałajevu zatrymali ŭ listapadzie 2024 hoda, a asudzili ŭ siaredzinie 2025-ha. Miarkujučy pa śpisie «ekstremistaŭ» MUS, jaje asudzili pa dvuch artykułach — «stvareńnie ekstremisckaha farmiravańnia» (č. 1 art. 361-1 KK) i «ŭdzieł u dziejańniach, jakija hruba parušajuć hramadski paradak» (č. 1 art. 342 KK).

Viadoma, što Volzie prysudzili termin u kałonii. Joj pahražała da siami hadoŭ, ale dakładny prysud nieviadomy.

KDB abvieściŭ čat «Biełyja kryły Baranavičy» — zusim mały i daŭno nieaktyŭny rajonny čat — ekstremisckim farmiravańniem uvosień 2024 hoda. Volha, padobna, była siarod maderataraŭ u čacie. Praŭda, administratar moža zrabić maderataram luboha ŭdzielnika navat bieź jahonaj prośby.

Vyjšli na Volhu praź nieabaronieny akaŭnt. Jon byŭ pryviazany da ŭłasnaha numara dziaŭčyny i prabivajecca praz boty, jakimi karystajucca hubazikaŭcy.

Kamientary da artykuła