Redaktar Reform.news Paŭlučenka zrabiŭ staŭku: U Biełarusi projdzie ci pieršaja sustreča Zialenskaha i Pucina, ci sami pieramovy
Na pohlad hałoŭnaha redaktara Reform.news Fiodara Paŭlučenki, jość niekalki arhumientaŭ na karyść taho, što Pucin i Zialenski sustrenucca ŭ Biełarusi.
Uładzimir Pucin i Uładzimir Zialenski. Fota: Mikhail Metzel, Sputnik, Kremlin Pool Photo via AP; AR
«Na moj pohlad, pakul zastajucca try varyjanty [placoŭki dla pieramovaŭ] — Abjadnanyja Arabskija Emiraty, Turcyja i, jak ni dziŭna, Biełaruś», — vykazaŭ mierkavańnie Fiodar Paŭlučenka ŭ aŭtarskim jutub-prajekcie «Saša, što ty niasieš?!».
Pavodle Paŭlučenki, arhumientaŭ na karyść Biełarusi niamała. Pa-pieršaje, łahična, kab pieramovy prachodzili ŭ Jeŭropie, bo havorka idzie pra jeŭrapiejskija spravy. Pa-druhoje, praviadzieńnie dyjałohu ŭ Minsku mahło b dapamahčy vyrašyć i častku biełaruskich unutranych prablem.
«To-bok, kali Łuka ŭzamien na heta adpuścić 1300 čałaviek, to ad hetaha ŭsie tolki ŭ vyjhryšy. Nu i vychodzić, što my pastupova padychodzim da idei, što chutčej za ŭsio [pieramovy buduć] u Biełarusi».
«A što, kali achova nie adpuścić Trampa ŭ Biełaruś? Ja vielmi sumniavajusia. Možam zrabić staŭku, projdzie ŭ Biełarusi ci nie», — prapanavaŭ u efiry druhi viadučy Alaksandr Atroščankaŭ.
Paŭlučenka na prapanovu pahadziŭsia i spraściŭ svaju staŭku:
«Ja staŭlu na toje, što ci pieršaja sustreča Zialenskaha i Pucina adbudziecca ŭ Biełarusi, ci ŭžo sam pieramoŭny praces, toj samy trochbakovy samit z udziełam Trampa, projdzie ŭ Biełarusi. Ale ja nie harantuju, to-bok staŭlu na toje, što nie abaviazkova Tramp źjavicca ŭ Biełarusi».
Paŭlučenka pastaviŭ taksama na toje, što sustreča adbudziecca da 1 listapada.
Čytajcie taksama:
Zialenski prakamientavaŭ mahčymaje miesca sustrečy z Pucinym
Łaŭroŭ zajaviŭ, što sustreča Pucina i Zialenskaha pakul nie hatovaja dla praviadzieńnia