Z rasijskaj armii zvolnili hienierała Łapina, jaki raniej nie raz traplaŭ u skandały

Pavodle paviedamleńniaŭ rasijskich Z-kanałaŭ, u hrupoŭcy vojskaŭ RF «Poŭnač» adbyłasia źmiena kamandavańnia: zamiest hienierał-pałkoŭnika Alaksandra Łapina jaje ŭznačaliŭ hienierał-lejtenant Jaŭhienij Nikifaraŭ, paviedamlaje Astra.

Alaksandr Łapin

Nikifarava nakiravali ŭ Kurskuju vobłaść jašče ŭ žniŭni 2024 hoda, kali tudy ŭvajšli padraździaleńni USU. Ale kiravańnie hetym napramkam usio adno zastavałasia za Łapinym, što pryviało da «dvojeŭładździa», jakoje praciahvałasia da apošnich dzion.

Ciapier, jak paviedamlajecca, Alaksandr Łapin zvolnieny z Uzbrojenych siłaŭ Rasii, pa niekatorych źviestkach — pa ŭłasnym žadańni i praz paharšeńnie zdaroŭja.

Łapin z 2017 hoda ŭznačalvaŭ vojski Centralnaj vajskovaj akruhi. U 2022-m jaho źniali z pasady kamandujučaha hrupoŭkaj «Centr» paśla krytyki Ramzana Kadyrava za niaŭdačy pad Limanam na Danbasie.

Akramia taho, hety hienierał nieadnarazova traplaŭ u skandały: ad uznaharodžańnia syna za pravalnaje nastupleńnie da vypadku, kali jon nakiravaŭ pistalet na mabilizavanaha, prymušajučy taho viarnucca na pazicyi.

Ź viasny 2024 hoda Łapin uznačalvaŭ Leninhradskuju vajskovuju akruhu i hrupoŭku «Poŭnač». Zachodnija ŚMI, u tym liku Wall Street Journal, nazyvali jaho adnym z adkaznych za praryŭ ukrainskich vojskaŭ u Kurskuju vobłaść letam 2024 hoda.

Jaŭhienij Nikifaraŭ

Novy kamandujučy, hienierał-lejtenant Jaŭhienij Nikifaraŭ, raniej uznačalvaŭ Zachodniuju vajskovuju akruhu, hrupoŭku «Zachad» i byŭ načalnikam Hałoŭnaha štaba Suchaputnych vojskaŭ Rasii.

Kamientary da artykuła