Milinkievič: Kali ŭ 2020 hodzie ŭ biełarusaŭ jašče byŭ hieapalityčny vybar, to ciapier jaho niama

Daradca Śviatłany Cichanoŭskaj Alaksandr Milinkievič raskazaŭ pra adziny šaniec być, isnavać Biełarusi i narodu, piša «Salidarnaść».

«Nam usim treba pazbaŭlacca stereatypaŭ, tradycyjnaha myśleńnia. 80 hadoŭ paśla vajny my žyli ŭ śviecie, kali demakraty i libierały pieramahali dyktatury, i heta byŭ taki žalezny trend, — nahadaŭ Alaksandr Milinkievič na kanfierencyi «Novaja Biełaruś». — Zaraz dyktatury na čale z Kitajem mohuć pieramahać demakratyi, jość uvohule niebiaśpiečnyja tendencyi.

I my ŭ hetym hłabalnym śviecie musim znajści svajo miesca, svaju niezaležnaść. Tamu treba vučycca być hnutkimi.

Niečakana moža zdarycca tak, što nam treba budzie brać uładu ŭ Biełarusi. I my pavinny być padrychtavanyja da hetaha momantu. Jon supiervažny.

Bo Pucin budzie zmahacca za Biełaruś nie mienš, čym za Ukrainu. Bo kali ŭ jaho ŭ «ruskim miry» nie budzie Biełarusi, heta budzie aznačać kaniec «ruskamu miru».

Milinkievič ličyć, što kali ŭ 2020 hodzie ŭ biełarusaŭ jašče byŭ hieapalityčny vybar, to ciapier jaho niama.

«Čym bližej my da Rasii, tym bližej my da taho, kab kančatkova stać kałonijaj Kramla, a z časam stać i ŭskrainaj kitajskaj impieryi.

Tamu daroha da Jeŭropy — heta adziny šaniec być, isnavać Biełarusi i narodu.

Liču, što nam mnoha treba rabić. Ale my musim hladzieć, jak ukraincy adstajvajuć svaju samastojnaść. Ukraincy abaranili Kijeŭ nie tamu, što ŭ ich było mnoha rakiet i zbroi, a tamu što ŭ ich byŭ ukrainski duch.

Nam treba ŭmacoŭvać samaśviadomaść, viedańnie historyi, umacoŭvać biełaruski duch. I nam treba nie iści ŭ Jeŭropu, nie vybirać Jeŭropu, nam treba viartacca na radzimu, a Jeŭropa i jość naša Radzima».

Kamientary da artykuła