Cichanoŭskaja: Nielha dapuścić, kab ź Biełarusi źniali sankcyi biez vyzvaleńnia palitviaźniaŭ
Śviatłana Cichanoŭskaja ličyć, što Alaksandr Łukašenka moža pasprabavać vykarystać budučyja pieramovy pamiž prezidentam ZŠA Donaldam Trampam i prezidentam Rasii Uładzimiram Pucinym, kab pavialičyć svoj palityčny ŭpłyŭ. Na jaje dumku, dziela hetaha jon moža pajści, naprykład, na vyzvaleńnie palitźniavolenych abo źmiakčeńnie represij, piša «Pozirk».
Śviatłana Cichanoŭskaja i Siarhiej Cichanoŭski, 27 červienia 2025. Fota Getty Images
Cichanoŭskaja padkreśliła, što ŭ pracesie hetych pieramovaŭ važna nie zabyć pra Biełaruś. Kali budzie abmiarkoŭvacca pytańnie źniaćcia sankcyj z Rasii, nieabchodna nie dapuścić aŭtamatyčnaha źniaćcia sankcyj i ź Biełarusi biez dadatkovych umoŭ dla režymu Łukašenki.
«Naprykład, kali budzie ŭzdymacca pytańnie źniaćcia sankcyj z Rasii, kab ź Biełarusi sankcyi nie źniali ciahničkom. Naša zadača — pakazać Biełaruś jak samastojnuju spravu, a nie apiendyks da Rasii, i adstojvać svaje pravy. Važna vyciahnuć z hetych pieramoŭ jak maha bolš, chacia b u pytańni vyzvaleńnia palitviaźniaŭ».
Śviatłana Cichanoŭskaja raskazała, što biełaruskija demsiły rehularna kaardynujuć svaje dziejańni z amierykanskimi partniorami i pieradajuć im svaje pazicyi.
Što da mahčymych pieramoŭ z Łukašenkam, to jana nahadała, što demsiły prapanoŭvajuć dyjałoh z 2020 hoda, ale režym razumieje jaho pa-inšamu: kali dla demakrataŭ heta dyjałoh z narodam dziela mirnaha tranzitu ŭłady, to dla ŭłady — kantakty ź inšaziemcami biez udziełu biełarusaŭ.
Tym nie mienš, Cichanoŭskaja ličyć, što prapanova pra dyjałoh moža stać aktualnaj u luby momant, a tamu važna być hatovymi da pieramoŭ i «kruhłaha stała».
Čytajcie taksama:
U Varšavie pačałasia kanfierencyja «Novaj Biełarusi»
Łatuška: U demsiłaŭ jość płan pa dniach na vypadak, kali pryjdziecca brać uładu ŭ svaje ruki