Jak paśla 2020 hoda skłaŭsia los maładoj prakurorki Valeryi Taratynka?
Dziaŭčyna atrymała nie tolki pavyšeńnie, ale i inšyja bonusy. A jašče joj daručyli zajmacca hienacydam.
Valeryja Taratynka. Fota: «Naša Niva»
Na sajcie Akademii kiravańnia pry Łukašenku hałoŭnaj žyćciovaj mudraściu 29-hadovaj vypusknicy paznačana razvažańnie pra pośpiech: «Pośpiech dasiahajecca nie pafasnymi razmovami, a doŭhaj, zaciataj i karpatlivaj pracaj».
U jaje vypadku heta ŭdarnaja praca z palityčna matyvavanymi prysudami. Valeryja Taratynka pačynała spravu pa fakcie naniasieńnia nadpisu «Nie zabudziem» na Puškinskaj, jakuju paśla pieradali Alinie Kaśjančyk.
Čytajcie taksama: Dzie ciapier prakurorka Kaśjančyk, jakoj paśla 2020-ha admovilisia zdavać kvateru?
Za «cyničny» nadpis, jaki, na pohlad abvinavaŭcaŭ, «źnievažaŭ hramadzian», Uładzisłaŭ Hulis atrymaŭ dva hady kałonii, Dzianis Hrachanaŭ i Ihar Samusienka — paŭtara hoda chimii.
Taratynka taksama brała ŭdzieł u hučnaj spravie pierakładčycy Volhi Kałackaj, jakuju sudzili za toje, što jana dała aplavuchu prapahandystu Ryhoru Azaronku. Niahledziačy na toje, što sam Azaronak paprasiŭ nie karać Volhu kryminałkaj, joj usio ž dali dva hady chatniaj chimii, jak i prasiła prakurorka.
U niekalkich sudovych spravach Taratynka była ŭžo paciarpiełaj — ad kamientaroŭ. Tak, za niecenzurny kamientar na jaje adras Źmicier Nieviaroŭski, jaki maje 3-ju hrupu invalidnaści, atrymaŭ dva hady chatniaj chimii. Amal taki ž los napatkaŭ sanitarku ankadyspansiera Hannu Bahačovu. Dadatkova jana zapłaciła prakurorcy tysiaču rubloŭ za maralnyja pakuty.
Valeryja Taratynka. Fota: pac.by
U zmahańni ź ludźmi inšych palityčnych pohladaŭ Taratynka nie hidziłasia i danosić: prynamsi, adzin zvanok ź jaje numara tyčyŭsia palityčnaha płakata na budaŭničym płocie, jaki mulaŭ jaje voku.
Karjera Taratynka pajšła ŭharu: kali ŭ 2020-m jana była staršaj pamočnicaj prakurora Frunzienskaha rajona Minska, to ŭ kancy 2021-ha ŭžo pracavała ŭ Hienieralnaj prakuratury — prakuroram va ŭpraŭleńni ŭzajemadziejańnia sa ŚMI i redakcyjnaj dziejnaści.
Siońnia jana — staršy prakuror upraŭleńnia pa nahladzie za rasśledavańniem asabliva važnych kryminalnych spraŭ Hienieralnaj prakuratury.
Fota: «Minskaja praŭda»
U kamandzie z hienieralnym prakuroram Andrejem Šviedam jana rasśleduje hienacyd biełaruskaha naroda. I navat paśpieła stać adnoj z układalnic navučalnaha dapamožnika dla 1-4 kłasaŭ «Hienacyd biełaruskaha naroda ŭ hady Vialikaj Ajčynnaj vajny». Z hetaj temaj Taratynka aktyŭna hastraluje pa krainie.
Bonusami dziaŭčynie za jaje starańni dastalisia aŭtohrafy Łukašenki i, napeŭna, kvatera ŭ Sienicy.
«Kali mnie było hadoŭ siem, maci spytała, kim ja chaču stać u budučyni, — uzhadvała Taratynka. — Nie zadumvajučysia, adkazała: «Prakuroram!»