Pamior Klimiencij Kožan
Pamior krajaznaŭca z Šarkoŭščyny, letapisiec Hiermanavickaha kraju Klimiencij Kožan, paviedamiŭ u fejsbuku jahony ziamlak, navukoviec z Hrodna Viačasłaŭ Buka. Jamu było 89 hadoŭ.
Klimiencij Kožan
Klimiencij Kožan naradziŭsia 23 studzienia 1936 hoda ŭ vioscy Bałbieki Šarkoŭščynskaha rajona.
Z 1951 pa 1955 hady vučyŭsia ŭ Hłybockim piedahahičnym vučyliščy, a paśla pastupiŭ na fakultet ruskaj movy i litaratury Biełdziaržuniviersiteta. Paśla jaho zakančeńnia niekalki hadoŭ pracavaŭ u škołach Brasłaŭskaha rajona, vykładaŭ ruskuju movu i litaraturu, historyju i hieahrafiju.
U 1966 hodzie viarnuŭsia ŭ rodny Šarkoŭščynski rajon, staŭ pracavać u Hiermanavickaj siaredniaj škole, dzie i byŭ nastaŭnikam ruskaj movy i litaratury, a taksama historyi 29 hadoŭ, da samaha vychadu na piensiju. Mieŭ hanarovaje zvańnie zasłužanaha nastaŭnika BSSR.
Paśla vychadu na piensiju z 1998 pa 2007 hady pracavaŭ navukovym supracoŭnikam Hiermanavickaha muzieja kultury i bytu.
Jašče ŭ Brasłaŭskim rajonie nastaŭnik zacikaviŭsia krajaznaŭstvam, a na małoj radzimie pradoŭžyŭ hetu spravu. Źbiraŭ materyjały pa historyi svajho kraju ŭ biblijatekach i archivach Minska, Vilni, Ryhi, Viciebska, Hłybokaha, Padolska. Siarod inšana plon jahonaj pracy adlustravany na staronkach historyka-dakumientalnaj chroniki «Pamiać. Šarkaŭščynski rajon».
Udzielničaŭ u krajaznaŭčych kanfierencyjach, čytańniach, kruhłych stałach, pryśviečanych vyvučeńniu histaryčnaha minułaha svajoj małoj radzimy. Pisaŭ artykuły dla srodkaŭ masavaj infarmacyi na krajaznaŭčuju tematyku, padtrymlivaŭ pierapisku ź siabrami-adnadumcami ź Biełarusi i zamiežža.
«Zastałasia pamiać ab im i stos listoŭ, napisanych akuratnym i razborlivym nastaŭnickim počyrkam», — napisaŭ pra jaho Viačasłaŭ Buka.
Siarod inšaha jašče ŭ saviecki čas Klimiencij Kožan padtrymlivaŭ adnosiny ź viadomaj biełaruskaj dziajačkaj Zośkaj Vieras, jakaja žyła ŭ Vilni:
«Ciaham amal 10 hadoŭ ja pryjazdžaŭ u Vilniu ŭ čas svajho letniaha adpačynku i źbiraŭ materyjały, historyi svajho rajona ŭ archivach i biblijatekach Vilni. Zośka Vieras i jaje ziać dapamahali mnie aryjentavacca i ŭ samim horadzie, i ŭ biblijatekach, i ŭ archivach. Mnohija materyjały ja znachodziŭ u ich doma, bo jana viała vialikuju pierapisku z roznymi biełaruskimi piśmieńnikami, paetami, mastakami. Pra ŭsich jana imknułasia raskazać mnie, paznajomić ź imi. Za heta ja joj vielmi ŭdziačny», — zhadvaŭ jon sam.