Pucin zajaviŭ Łukašenku, što va Ukrainie Rasija nie zachoplivaje terytoryi, a viartaje svaje. Toj zaśmiajaŭsia

Prezident Rasii Uładzimir Pucin padčas sustrečy z Alaksandram Łukašenkam na Vałaamie znoŭ zajaviŭ, što Rasija, maŭlaŭ, nie zachoplivaje ŭkrainskija terytoryi, a tolki viartaje toje, što ličyć svaim.

Fota: Gavriil Grigorov Sputnik Kremlin Pool Photo via AP

Pucin prakamientavaŭ situacyju vakoł horada Časaŭ Jar u Danieckaj vobłaści, pra zachop jakoha niadaŭna abviaściła rasijskaje Minbarony.

Padčas razmovy Łukašenka adznačyŭ, što Ukrainie treba sadzicca za stoł pieramovaŭ na ŭmovach Pucina, inakš rasijskija vojski, maŭlaŭ, «usio adhryzuć, zachopiać i pojduć dalej, advajujuć». Pucin paśpiašaŭsia papravić Łukašenku, što pra zachop nibyta havorki nie idzie: «Viernuć, — skazaŭ jon. — Heta — naša».

U červieni Pucin užo zajaŭlaŭ u Sankt-Pieciarburhu, što ličyć Ukrainu «našaj», bo rasijanie i ŭkraincy nibyta «adzin narod», a Rasija — tam, dzie stupaje naha rasijskaha sałdata.

Hetym razam Pucin znoŭ padkreśliŭ, što ličyć ukraincaŭ i rasijan «adnym narodam» i tamu nibyta maje prava na hetyja ziemli. Taksama Pucin paviedamiŭ, što rasijskaja armija, maŭlaŭ, nastupaje pa ŭsim froncie — u pryhraničnaj zonie i ŭ Danieckaj, Łuhanskaj, Zaparožskaj i Chiersonskaj abłaściach.

Što tyčycca rasijskich strat, to rasijski kiraŭnik zajaviŭ, što jany, maŭlaŭ, nie byli marnymi — zahinułyja vajskoŭcy nibyta stvaryli ŭmovy dla nastupleńnia i pieramohi.

Kamientary da artykuła