U Danii ŭviali abaviazkovuju vajskovuju słužbu dla žančyn

Z 1 lipienia 2025 hoda ŭ Danii ŭviali abaviazkovuju vajskovuju słužbu dla žančyn naroŭni z mužčynami. Rašeńnie pryniata na fonie rostu pahrozy z boku Rasii i nieabchodnaści ŭzmacnić abaronu krainy, paviedamlaje Assotiated Press.

Fota: Ministerstva abarony Danii

Ciapier usie paddanyja dackaha karala, jakija dasiahnuli 18 hadoŭ, pavinny stanavicca na ŭlik u vojska i prachodzić adbor. Da hetaha žančyny mahli słužyć tolki dobraachvotna.

Raniej urad płanavaŭ uvieści hetyja źmieny z 2027 hoda, ale vyrašyŭ paskoryć reformu. Termin słužby taksama pavialičany — z 4 da 11 miesiacaŭ.

Pavodle słoŭ kiraŭnika pryzyŭnoj słužby pałkoŭnika Kienieta Štroma, heta nieabchodna, kab uzmacnić bajazdolnaść i adpaviadać patrabavańniam abarončaj palityki NATA.

Ciapier nabor u vojska adbyvajecca tak: spačatku prymajuć dobraachvotnikaŭ, a astatnija miescy zapaŭniajucca vypadkovym čynam praz łatareju. Płanujecca, što da 2033 hoda štohod na słužbu buduć pryzyvać kala 6,5 tysiačy čałaviek (u 2024 hodzie było 4,7 tysiačy, ź jakich 24% — žančyny). Na siońnia ŭ dackich Uzbrojenych siłach słužyć kala 9 tysiač prafiesijnych vajskoŭcaŭ, a nasielnictva krainy — kala 6 miljonaŭ čałaviek.

Danija stała apošniaj krainaj Paŭnočnaj Jeŭropy, jakaja ŭviała vajskovy abaviazak dla žančyn. Raniej heta zrabili Narviehija (u 2015 hodzie) i Šviecyja (u 2017-m).

U lutym premjer-ministarka Danii Miete Frederyksien zajaviła, što Danija pavialičyć vydatki na abaronu na 50 miljardaŭ dackich kron (prykładna $7 miljardaŭ) u najbližejšyja dva hady. Heta daviadzie vajskovyja vydatki da 3% VUP — samaha vysokaha pakazčyka za apošnija 50 hadoŭ. Na samicie NATA ŭ červieni Danija padtrymała metu padniać vydatki da 5% VUP da 2035 hoda, jak hetaha patrabavaŭ prezident ZŠA Donald Tramp.

Frederyksien padkreśliła, što Rasija ŭjaŭlaje surjoznuju pahrozu, vyrablajučy bolš bojeprypasaŭ za try miesiacy, čym NATA — za ceły hod. Jana nazvała vajnu va Ukrainie vynikam «impierskich ambicyj» Uładzimira Pucina i adznačyła, što nie ŭpeŭnienaja, što jon spynicca tolki na hetaj krainie.

Kamientary da artykuła