«Kazyrami nie raskidvajucca. Baćka pierajhraŭ i źniščyŭ». Jak prapahanda patłumačyła vyzvaleńnie Cichanoŭskaha

Vyzvaleńnie Siarhieja Cichanoŭskaha, jakoje adbyłosia ŭ suviazi z sustrečaj Alaksandra Łukašenki z amierykanskim śpiecpasłańnikam Kitam Kiełaham stali padstavaj dla aktyvizacyi biełaruskaj prapahandy. Treba było niejak patłumačyć svajoj aŭdytoryi, čamu varta było trymać Cichanoŭskaha piać hadoŭ za kratami i adnačasova čamu jaho vyzvaleńnie — adzina pravilnaje i svoječasovaje rašeńnie.

Skrynšot videa: pul_1 / Telagram

«Cichanoŭski-hiejt»

Vyzvaleńnie Cichanoŭskaha pakazvajecca jak častka vialikaj hulni, u jakoj Łukašenka vykarystoŭvaje palitviaźniaŭ u jakaści kozyraŭ.

Kanał Biełteleradyjokampanii News.by piša:

«U Biełarusi nie pryniata raskidvacca kozyrami dziela miascovaj palityčnaj dramy — ich bierahuć dla adpaviednaha momantu. I hety momant nastupiŭ. Klučavoje — što historyja z «Cichanoŭski-hiejt» vykarystoŭvałasia zmaharami i ich kuratarami dla asabistaha pijaru i nabivańnia kišeniaŭ hrantami, tady jak Biełaruś abiarnuła jaje na dabro krainy».

Siarhiej Cichanoŭski ŭ jakaści palitviaźnia, pa interpretacyi prapahandystaŭ, byŭ vyhadny apazicyi, jakaja byccam by vykarystoŭvała jaho imia dla zboru hrošaj, pryciahnieńnia ŭvahi i ŭnutranych manipulacyj. Tamu jaho vyzvaleńnie — heta, jak śćviardžaje prapahanda, udar pa samim apazicyjnym asiarodździ.

Kanał News.by śćviardžaje:

«Baćka pierajhraŭ i źniščyŭ. Piać hadoŭ usio kodła padofisnych zmaharoŭ nasiłasia z kiejsam «Cichanoŭski» jak z sakralnym miedyjnym skarbam.

Mienavita pad Siarožu źbiralisia hrošy z davierlivych łachoŭ i sarasaniataŭ. Mienavita hetym, jašče vyraznym, tvaram handlavała ŭsia bčb-supolnaść — dziela babła».

Žurnalistka Hładkaja ŭ svaim styli pieratvaraje vyzvaleńnie palitviaźniaŭ u łakaničny pahardlivy kamientar:

«Cichanoŭski, Łosik i h.d. Prosta vykiniem śmiećcie».

Admietna, što jana nie mieła nijakaj infarmacyi pra imiony vyzvalenych i pračytała naviny ŭ niezaležnych ŚMI — jakija spačatku pamyłkova dadali Ihara Łosika ŭ śpis vyzvalenych.

Anarchija ŭ stanie voraha

Prapahanda pradrakaje, što vyzvaleńnie Cichanoŭskaha pryviadzie da raskołu ŭ apazicyi. Ihar Tur pierakanany:

«Łukašenka znoŭ usich pierajhraŭ. Čakajem, što z usich bakoŭ u biehłych pačniecca mačyłava — muž suprać usich, usie suprać siamiejnaj pary za ŭładu, što zastałasia, i hranty. Anarchija ŭ voraha — usio, jak my lubim. I aktyŭna toj anarchii sadziejničajem».

Aŭtary kanała «Na Zapadnom frontie» dadajuć dramatyzmu:

«U zmaharoŭ vybili apošnija «kozyry». Zmahary, my ž kazali, što siońnia dla vas pačynajecca novaja era. Na šachmatnaj došcy papaŭnieńnie. Zachaplalny ekšn-tryler pačaŭsia, tamu zapasajemsia papkornam, bo ŭ najbližejšaj budučyni nas čakajuć samyja haračyja i vostrasiužetnyja pavaroty. Biažycie! U dobry šlach, darahija vypuskniki!»

«U Baćki jašče jość kozyry»

Prapahandysty pišuć, što vyzvaleńnie palitviaźniaŭ i sustreča z amierykancami — tolki pačatak vialikaj hulni. Łukašenka, maŭlaŭ, nie skazaŭ apošniaha słova.

Kanał News.by robić niedvuchsensavy pasył:

«U Baćki jašče jość kozyry ŭ rukavie. Pajšła hulnia pa-bujnomu».

Kanał «Biełaruski siłavik» dadaje hieapalityčny kantekst:

«A što, kali ciapier u Jeŭropu pojdzie biełaruski haz i nafta… kali vy razumiejecie, pra što ja».

«Paśla padobnych vizitaŭ, jak pakazvaje praktyka, varta čakać aktyvizacyi dypłamatyčnych i nieaficyjnych kantaktaŭ ZŠA nie tolki ź Minskam, ale i z klučavymi sajuźnikami Biełarusi — pieradusim, z Rasijaj», — pradrakaje «Biełaruski front».

Kamientary da artykuła