U hulniach za zbornuju Kitaja debiutavała 18-hadovaja baskietbalistka ź fienamienalnym rostam
18-hadovaja baskietbalistka Čžan Czyjuj debiutavała za nacyjanalnuju žanočuju zbornuju Kitaja i adrazu stała zorkaj internetu. Pryčyna takoj uvahi — jaje ŭnikalny rost: 226 sm! Heta adzin z samych vysokich pakazčykaŭ u historyi žanočaha baskietboła, i pra bolš vysokich spartsmienak aficyjnaj infarmacyi niama, piša «Trybuna».
Svaju pieršuju hulniu za darosłuju zbornuju Čžan praviała suprać Bośnii i Hiercahaviny 16 červienia. Za 12 chvilin na placoŭcy jana paśpieła nabrać 16 ačkoŭ i zrabić 7 padboraŭ, a Kitaj pieramoh ź likam 127:56.
Dziaŭčynu tut ža paraŭnali ź Jaa Minam — znakamitym kitajskim centravym, jaki taksama mieŭ vielizarny rost (229 sm).
Raniej Čžan užo zajaŭlała pra siabie na moładzievym uzroŭni. Na Kubku Azii U-18 jana była pryznanaja najlepšym hulcom (MVP), nabirajučy ŭ siarednim 35 ačkoŭ, 12,8 padboraŭ i amal 3 pieradačy za matč.
Čžan Czyjuj užo traplała ŭ centr uvahi, kali joj było ŭsiaho 14 hadoŭ — fota z turniru U-15, dzie jana značna pieraŭzychodziła supiernic pa roście, stali virusnymi.
Tłumačeńnie ž takoha fienamienalnaha rostu, vidać, u hienietycy: baćka i maci Čžan taksama byli baskietbalistami, ich rost — 213 i 198 sm adpaviedna.
Ciapier dziaŭčyna vystupaje za sistemu kłuba «Piekin» i ŭžo ŭdzielničała ŭ Matčy zorak Kitaja. U žanočuju NBA jana zmoža trapić nie raniej, čym joj spoŭnicca 20 hadoŭ — takija praviły dla zamiežnych spartsmienak.
Fota i videa z Čžan virusiacca ŭ sacsietkach, źbirajučy miljony prahladaŭ — z-za jaje rostu i stylu hulni.
Čytajcie taksama:
Upieršyniu z 2008 hoda źmianiŭsia čempijon Biełarusi pa baskietbole