У гульнях за зборную Кітая дэбютавала 18-гадовая баскетбалістка з фенаменальным ростам
18-гадовая баскетбалістка Чжан Цзыюй дэбютавала за нацыянальную жаночую зборную Кітая і адразу стала зоркай інтэрнэту. Прычына такой увагі — яе ўнікальны рост: 226 см! Гэта адзін з самых высокіх паказчыкаў у гісторыі жаночага баскетбола, і пра больш высокіх спартсменак афіцыйнай інфармацыі няма, піша «Трыбуна».
Сваю першую гульню за дарослую зборную Чжан правяла супраць Босніі і Герцагавіны 16 чэрвеня. За 12 хвілін на пляцоўцы яна паспела набраць 16 ачкоў і зрабіць 7 падбораў, а Кітай перамог з лікам 127:56.
Дзяўчыну тут жа параўналі з Яа Мінам — знакамітым кітайскім цэнтравым, які таксама меў велізарны рост (229 см).
Раней Чжан ужо заяўляла пра сябе на моладзевым узроўні. На Кубку Азіі U-18 яна была прызнаная найлепшым гульцом (MVP), набіраючы ў сярэднім 35 ачкоў, 12,8 падбораў і амаль 3 перадачы за матч.
Чжан Цзыюй ужо трапляла ў цэнтр увагі, калі ёй было ўсяго 14 гадоў — фота з турніру U-15, дзе яна значна пераўзыходзіла суперніц па росце, сталі віруснымі.
Тлумачэнне ж такога фенаменальнага росту, відаць, у генетыцы: бацька і маці Чжан таксама былі баскетбалістамі, іх рост — 213 і 198 см адпаведна.
Цяпер дзяўчына выступае за сістэму клуба «Пекін» і ўжо ўдзельнічала ў Матчы зорак Кітая. У жаночую НБА яна зможа трапіць не раней, чым ёй споўніцца 20 гадоў — такія правілы для замежных спартсменак.
Фота і відэа з Чжан вірусяцца ў сацсетках, збіраючы мільёны праглядаў — з-за яе росту і стылю гульні.
Чытайце таксама:
Адвакат латвійскага баскетбаліста Цімы: З расійскага морга яго аддалі голым, без грыму і бальзамацыі
Упершыню з 2008 года змяніўся чэмпіён Беларусі па баскетболе
Міжнародная федэрацыя баскетбола працягнула адхіленне беларусаў ад міжнародных спаборніцтваў