Samaja modnaja biełaruskaja apazicyjanierka Maryna Hiryn pajšła ŭ kryžovy pachod suprać Jeŭraradyjo
Eks-supracoŭnica Ministerstva pa padatkach i zborach, a ciapier sustaršynia ABBA (Asacyjacyi biełaruskaha biznesu za miažoj) aburanaja, što žurnalisty Jeŭraradyjo parazmaŭlali ź joj i apublikavali jaje pazicyju.
Startavuju pretenziju da Jeŭraradyjo Maryna Hiryn supravadziła novym modnym łukam. Fota facebook.com/marina.girin
Kryžovy pachod sustaršyni ABBA, hramadzianki Biełarusi i Polščy Maryny Hiryn suprać «Jeŭraradyjo» nasamreč vyhladaje krynžovym. Byłaja biełaruskaja čynoŭnica aburanaja, što žurnalisty pracytavali jaje słovy, ale… nie pierapravieryli fakty ŭ ich. «Ja liču hrubym parušeńniem maich pravoŭ toj fakt, što maje słovy byli vykarystanyja biez majoj zhody i biez pravierki faktaŭ», — napisała jana ŭ fejsbuku.
Čytajcie taksama:
Zdajecca, vyznačyłasia samaja modnaja para biełaruskaj apazicyi. Jak vam ich pačućcie stylu?
Hiryn, Bury i navat Knyrovič adreahavali na artykuł pra samuju modnuju paru biełaruskaj apazicyi
Što ž adbyłosia?
Biznesmien Alaksandr Knyrovič napisaŭ u sacsietkach, što kampanija Lodka Production padała zajavu ŭ prakuraturu Polščy na ABBA. Jeŭraradyjo vyrašyła skarystacca hetaj infarmacyjnaj nahodaj. Žurnalist napisaŭ Marynie Hiryn, atrymaŭ jaje kamientar i apublikavaŭ materyjał. Standartnaja situacyja, redakcyi štodzień vystaŭlajuć ź dziasiatak takich navinaŭ.
Adnak u situacyi z Hiryn usio akazałasia niaprosta. Jaje aburaje šmat što.
I sam fakt taho, što Jeŭraradyjo pracytavała Knyroviča — a jon ža «sistemny krytyk ABBA», narakaje Hiryn.
I toje, što kanflikt apisvajecca nie z pazicyi ABBA.
I toje, što ŭ navinie jość skaz ad pradstaŭnika Lodka Productions Antosia Sivych — jon nazvany «stvaralnikam kampanii», ale, maŭlaŭ, jurydyčna nie źjaŭlajecca ni zasnavalnikam, ni kiraŭnikom.
Adnak asnoŭnaje — Hiryn sprabuje zrabić vyhlad, što kali joj napisaŭ žurnalist, pradstaviŭsia Jeŭraradyjo i paprasiŭ kamientar, to jana i padumać nie mahła, što jon apublikuje jaje słovy.
«Ja ŭsprymała pytańnie jak pryvatnuju cikavaść čałavieka», — pierakonvaje Hiryn i praciahvaje: «Aŭtar artykuła prosta złoŭžyŭ maim davieram i skarystaŭsia tym, što razmova była spantannaja, i ja ŭ toj momant była zaniataja inšymi spravami».
Jeŭraradyjo admaŭlaje pretenzii. «Prośba pra kamientar z boku žurnalista, jaki nazvaŭ siabie i svajo miedyja, biezumoŭna, nie źjaŭlajecca pryvatnaj cikavaściu», — havorycca ŭ redakcyjnym zvarocie.
U vyniku Maryna Hiryn źviarnułasia ŭ Biełaruskuju asacyjacyju žurnalistaŭ, Jeŭrapiejskuju fiederacyju žurnalistaŭ i Mižnarodny instytut presy z prośbaj pačytać navinu Jeŭraradyjo pra finansavy kanflikt ABBA i jaje padradčyka Lodka Production, acanić jaje, a taksama, siarod inšaha, pryciahnuć da adkaznaści vinavatych. Jakim čynam žurnalisckija asacyjacyi mohuć pryciahvać kahości da adkaznaści — nie paviedamlajecca.