BIEŁ Ł RUS

Syravarnia ŭ Kopysi, jakuju ŭčora inśpiektavaŭ Łukašenka, naležyć Siarhieju Ciacierynu. Ale, vidać, nie nadta jaho raduje 

22.04.2025 / 17:37

Nashaniva.com

21 krasavika 2025 hoda Alaksandr Łukašenka «raptoŭna» pryjechaŭ u cech pa vytvorčaści syroŭ TAA «Miłkkop start» u Kopysi. Jahonaja pres-słužba zajaviła, što mienavita Łukašenka byŭ inicyjataram adradžeńnia hetaj vytvorčaści. Reform.news daviedałasia, kamu kankretna naležyć hetaje pradpryjemstva na małoj radzimie Łukašenki.

Alaksandr Łukašenka razam ź Siarhiejem Ciacierynym adznačajuć pieramohu tenisistki Aryny Sabalenki, 2023 hod. Fota: skrynšot ź videa

Kopyś, u jakim pa stanie na 2023 hoda žyvie 628 čałaviek (2023 hod) i jaki aficyjna ličycca radzimaj Łukašenki, prapahanda nazyvaje haradskim pasiołkam budučyni. Tam pabudavali novuju drevaapracoŭčuju liniju, syravarniu, mini-piakarniu, centr narodnaj tvorčaści z vytvorčaściu kieramiki i bankietnaj załaj.

Syravarnia i piakarnia naležać TAA «Miłkkop start». Heta pradpryjemstva było zarehistravana ŭ kastryčniku 2023 hoda. U jaho tolki adzin uładalnik — sialanskaja (fiermierskaja) haspadarka «Start TS», dyrektaram jakoj paznačany Sarahaviec Siarhiej Ivanavič.

Skrynšot vypiski z ADR

Ale sapraŭdny ŭładalnik «Start TS» — nie prosty fiermier. Haspadarku stvaryŭ były trenier pa tenisie, a ciapier upłyvovy biznesmien Siarhiej Ciacieryn. Jon uvachodzić u najbližejšaje koła Alaksandra Łukašenki i časta milhaje ŭ kadry razam ź im.

Zhodna z vypiskaj z adzinaha dziaržrehistratara jurydyčnych asob i IP, Ciacierynu naležyć 100% fiermierskaj haspadarki.

Skrynšot vypiski z ADR

Svaju łatyfundyju Ciacieryn pačaŭ stvarać u 2018 hodzie pad ciskam Łukašenki. Dla hałaŭnoj siadziby prydvorny biznesmien abraŭ viosku Chimy Aršanskaha rajona. Jana znachodzicca za niekalkich kiłamietraŭ ad Kopysi i vioski Aleksandryja Škłoŭskaha rajona na druhim bierazie Dniapra, adkul pachodzić rod Łukašenki i dzie jon sam pravioŭ svajo dziacinstva. 

Ciacieryn niekalki hadoŭ skuplaŭ u hetaj miascovaści ŭčastki «dla viadzieńnia sialanskaj (fiermierskaj) haspadarki». Ahulnaja płošča ziamli, jakaja ciapier u jahonym kiravańni — prykładna 29 hiektaraŭ.

Ale vyhladaje, što Ciacierynu ciapier nadakučyła zajmacca syrarobstvam (kali ŭvohule choć kali heta i tak padabałasia), i niaprofilny aktyŭ jon chacieŭ by skinuć na dziaržavu. Heta vynikaje z apublikavanaha pres-słužbaj Łukašenki videa jahonaj razmovy sa svaimi čynoŭnikami, jakaja nie ŭvajšła ŭ aficyjny pres-reliz.

«Nu a pa hetym syrzavodzie pryncypova raźbirajsia. Kali nie spraŭlajecca — filijałam da Škłoŭskaha zavoda, tam možna zrabić. Ty ž bačyš, što tam šykoŭnaje pradpryjemstva», — źviarnuŭsia Łukašenka da svajho kiraŭnika spraŭ Juryja Nazarava.

Toj, adnak, nie vielmi choča hetym zajmacca i sprabavaŭ pieravieści strełki na kiraŭnika NANB Uładzimira Husakova, u jakoha nibyta jość šmat čyrvonych karoŭ i jaki daŭno prosić pad pierapracoŭku ich małaka niejkaje pradpryjemstva. 

Čytajcie taksama:

Łukašenka abvinavaciŭ u prablemach na «Amkadory» jahonaha byłoha ŭładalnika

Leśnikam dazvolać pryvatyzavać arendnaje žyllo

Kolki zarabiła kampanija Baskava na mierčy Łukašenki

Łukašenka znoŭ paabiacaŭ biełarusam «asabliva składany» hod

Kamientary da artykuła