Šrajbman pra toje, što zrazumieŭ z razmoŭ ź jeŭrapiejskimi dypłamatami

Analityk Arciom Šrajbman parazvažaŭ, ci zmoža Jeŭropa naraścić dapamohu Ukrainie.

Prezident ZŠA Donald Tramp spyniŭ vajskovuju dapamohu Ukrainie. Nakolki zmohuć krainy Jeŭropy jaje kampiensavać?

Na pohlad analityka Arcioma Šrajbmana, za try hady vajny jeŭrapiejcy rabili niedastatkova, choć šmat abiacali. Ale sami jeŭrapiejcy hladziać na situacyju inakš. U jakaści prykładu Šrajbman zhadaŭ svaju niadaŭniuju razmovu ź jeŭrapiejskimi dypłamatami:

«Voś my niadaŭna byli na adnoj sustrečy z zachodnimi dypłamatami, i ja adnamu skazaŭ: «Čamu my pavinny ciapierašnija zajavy ab tym, što Jeŭropa pračynajecca, niejak usprymać inakš, čym toje, što vy havaryli try hady tamu, kali poŭnamaštabnaja vajna tolki pačałasia? Vy ž ničoha nie zrabili za hetyja try hady pa vialikim rachunku». Jon adkazvaje: «Nu jak heta «ničoha»? My svaje čakańni ad siabie pieravykanali».

I ja razumieju, što heta praŭda»,

— zaŭvažaje Šrajbman u novym vypusku jutub-prajekta «Hadzińničak cikaje».

Analityk dadaje:

«Jany majuć racyju ŭ tym, što pieravykanali svaje ŭłasnyja čakańni ad siabie i svaje ŭłasnyja mahčymaści. Pytańnie, ci jość u ich jašče zapas, kab pieravykanać ich jašče tak, kab hetaha chapiła. Naša płanka čakańniaŭ, kab heta Ukrainu vyratavała. A ich płanka čakańniaŭ — «Nu, my siabie pieraadoleli». Pytańnie ŭ tym, ci syducca hetyja čakańni i realnaść».

Na pohlad Šrajbmana, patrabavańnie z boku administracyi Trampa da Jeŭropy ŭziać na siabie adkaznaść za ŭłasnuju biaśpieku pryvodzić da peŭnaha abudžeńnia ES.

«Mnie zdajecca, heta moža być adzinym pabočnym plusam hetaj administracyi ZŠA. Ja nie hatovy potym vykazać joj udziačnaść. Jak niekatoryja kažuć: Tramp na samoj spravie kapituluje va Ukrainie, kab Jeŭropa adumałasia. (…) Ja ŭ heta nie vieru, tamu što vykazvać udziačnaść ZŠA ŭ takoj situacyi heta ŭsio adno, jak być udziačnym baćku, jaki pajšoŭ ź siamji da susiedki, za toje, što dzieci navučylisia pracavać».

Kamientary da artykuła