Ukraina atrymaje tysiačy ŭdarnych dronaŭ sa štučnym intelektam ad jeŭrapiejskaj kampanii

Što za drony i što za kampanija?

Drony HX-2. Fota: helsing.ai

Jeŭrapiejskaja abaronnaja technałahičnaja kampanija Helsing abviaściła pra płany pastavić Ukrainie 6000 udarnych bieśpiłotnikaŭ HX-2 sa štučnym intelektam.

Jak adznačyli ŭ kampanii, HX-2 — heta vysokadakładny dron-kamikadze z X-padobnymi kryłami, abstalavany elektraruchavikom, jaki zabiaśpiečvaje dalnaść palotu da 100 kiłamietraŭ i maksimalnuju chutkaść 220 kiłamietraŭ u hadzinu.

Bieśpiłotnik moža nieści roznyja typy bojeprypasaŭ i abstalavany bartavym štučnym intelektam, jaki dazvalaje jamu šukać, paŭtorna identyfikavać i paražać celi navat bieź sihnału ci stałaha padłučeńnia da danych. Takim čynam na jaho nie dziejničajuć rasijskija sistemy elektramahnitnaha padaŭleńnia, jakija parušajuć suviaź pamiž bieśpiłotnikam i apierataram.

Jašče adnoj asablivaściu źjaŭlajecca toje, što vykarystańni śpiecyjalnaha prahramnaha zabieśpiačeńnia Altra ad Helsing dla raźviedki i naniasieńnia ŭdaraŭ niekalki HX-2 mohuć abjadnoŭvacca ŭ hrupy pad kiravańniem adnaho čałavieka-apieratara.

Kampanija zajaŭlaje, što dziakujučy pieradavym technałohijam vytvorčaści, takim jak 3D-druk, moža vyrablać dziasiatki tysiač dronaŭ u hod pa značna mienšym košcie, čym zvyčajnyja sistemy, takim čynam zapaŭniajučy prabieł u sučasnych mahčymaściach naziemnaj vajny.

Suzasnavalnik Helsing Hundbiert Šerf zajaviŭ: «My naroščvajem vytvorčaść HX-2 u adkaz na dadatkovyja zakazy z Ukrainy, dzie masavyja vysokadakładnyja ataki kampiensujuć niedachop tradycyjnych uzbrajeńniaŭ».

U kampanii dadali, što heta praciah papiaredniaj zamovy na 4000 udarnych bieśpiłotnikaŭ HF-1, jakija ciapier pastaŭlajucca va Ukrainu ŭ partniorstvie z ukrainskaj pramysłovaściu.

Novaja partyja bieśpiłotnikaŭ robić Helsing adnym z najbujniejšych u śviecie vytvorcaŭ udarnych bieśpiłotnikaŭ. Zasnavanaja ŭ 2021 hodzie, jana chutka stała adnym ź viadučych startapaŭ u hetaj halinie.

U lipieni 2024 hoda kampanija pryciahnuła $490 miljonaŭ inviestycyj pry acency ŭ $5,38 miljardaŭ, što padkreślivaje jaje značny rost i davier inviestaraŭ.

Helsing maje ofisy ŭ Miunchienie, Łondanie i Paryžy, a taksama supracoŭničaje ź viadučymi abaronnymi kampanijami, takimi jak Rheinmetall, Saab i Airbus, dla intehracyi technałohij štučnaha intelektu ŭ najaŭnyja płatformy, uklučajučy źniščalniki.

Akramia Ukrainy HX-2 užo vykarystoŭvajecca ŭ Vialikabrytanii i inšych krainach NATA. Hundbiert Šerf zajaviŭ, što «NATA pavinna chutka zasvoić važnyja ŭroki» Ukrainy. Kampanija ŭkaraniaje padychod da raźmierkavanaj masavaj vytvorčaści pa ŭsioj Jeŭropie. Heta dazvolić asobnym dziaržavam samastojna vyrablać sistemy i zabiaśpiečvać suvierenitet vytvorčaści i łahistyčnych pastavak.

Vytvorca ŭpeŭnieny, što jahonyja drony dapamohuć aljansu, jakomu terminova patrebnyja technałohii dla abarony ŭschodniaha fłanhu. Pavodle kampanii, masavaje razhortvańnie HX-2 uzdoŭž miežaŭ dazvolić stvaryć «ščyt ad uvarvańnia», zdolny supraćstajać varožym siłam na ziamli.

Kamientary da artykuła