Adesit, jaki pieražyŭ Chałakost, paraŭnaŭ u Bundestahu Hitlera i Pucina

88-hadovy žychar Adesy Raman Švarcman, vystupajučy ŭ niamieckim Bundestahu, pravioŭ paraleli pamiž rasijskim uvarvańniem va Ukrainu i Druhoj suśvietnaj vajnoj, paviedamlaje Deutsche Welle.

Raman Švarcman u Bundestahu. Fota: Michael Kappeler/picture alliance via Getty Images

Žychar Adesy, jaki pieražyŭ Chałakost, u pramovie pierad Bundestaham paraŭnaŭ rasijskuju vajennuju ahresiju suprać jahonaj krainy, z varvarskimi złačynstvami nacystaŭ padčas Druhoj suśvietnaj vajny.

«U tyja časy mianie sprabavaŭ zabić Hitler, pakolki ja jaŭrej. Ciapier Pucin sprabuje zabić mianie, tamu što ja ŭkrainiec», — zajaviŭ Raman Švarcman, vystupajučy ŭ niamieckim parłamiencie na pasiadžeńni ŭ pamiać achviar nacyjanał-sacyjalizmu 29 studzienia.

Adnačasova Švarcman zaklikaŭ Hiermaniju pavialičyć vajskovuju padtrymku Ukrainy.

«Ja zaklikaju vas — uzbrojcie nas, kab Pucin skončyŭ hetuju vajnu na źniščeńnie», — zaklikaŭ 88-hadovy ŭkrainiec, asabliva adznačyŭšy patrebu Ukrainy ŭ rakietach vialikaj dalokaści.

Pa słovach Švarcmana, ciapierašnija pakaleńni pavinny prykłaści namahańni, «kab nichto bolš nie adčuvaŭ pakut i katavańniaŭ», heta ich histaryčny i maralny abaviazak.

«Siońnia my pavinny znoŭ zrabić usio mahčymaje, kab pakłaści kaniec varvarstvu», — padkreśliŭ jon.

Raman Švarcman źjaŭlajecca staršynioj Adeskaj rehijanalnaj asacyjacyi jaŭrejaŭ i pradstaŭlaje achviar Chałakostu. Va ŭzroście 5 hadoŭ jon trapiŭ u Bieršadskaje hieta ŭ Vińnickaj vobłaści. Ź jahonych słoŭ, jon i praz 80 hadoŭ jašče pamiataje źniavahi, bol i pastajanny hoład u hieta.

Paśla pramovy Švarcmana deputaty apładziravali jamu stojačy. Fiederalny prezident Hiermanii Frank-Valter Štajnmajer padziakavaŭ hościu za toje, što zmoh pryjechać u Bierlin, i adznačyŭ heta jak honar dla prysutnych. 

Kamientary da artykuła