«Sustrelisia i havaryli paru hadzin». Kanapackaja raskazała, jak Rumas klikaŭ jaje va ŭrad

U kastryčniku 2019 hoda tahačasny premjer-ministr Siarhiej Rumas publična ci to žartam, ci surjozna zaprasiŭ Hannu Kanapackuju va ŭrad. Jana raskazała, što było dalej.

Siarhiej Rumas. Archiŭnaje fota 2018 hoda. Maxim Guchek / BelTA Pool Photo via AP

Kanapackaja tady była deputatkaj Pałaty pradstaŭnikoŭ. Padčas papiaredniaha čytańnia pa prajekcie biudžetu Biełarusi na 2020 hod jana spytała ŭ Rumasa, jak urad źbirajecca vykonvać prahnozny pakazčyk na piać hadoŭ.

U adkaz premjer raskrytykavaŭ svoj urad za słabuju pracu, adznačyŭ, što ekanomicy patrabujucca strukturnyja reformy i prapanavaŭ Kanapackaj miesca ŭ Saŭminie.

«Ja aficyjna vas zaprašaju na pracu va ŭrad, kab vy dapamahli nam vyrašyć hetuju zadaču», — skazaŭ tady Rumas Kanapackaj, jakaja pakidała parłamient.

Hanna padziakavała premjeru za prapanovu, i jany damovilisia abmierkavać hetaje pytańnie paźniej.

Hanna Kanapackaja. Fota ź jaje sacsietak

Ciapier Kanapackaja ŭ intervju «Točcy» raspaviała, što było dalej. Pavodle jaje słoŭ, jana sapraŭdy sustrełasia z premjeram, i jany prahavaryli paru hadzin sam-nasam.

«Dumaju, što heta była sproba naładzić dyjałoh z toj častkaj hramadstva, jakaja prytrymlivajecca inšych pohladaŭ na ekanamičnuju madel… Ja ŭ pryncypie zastałasia ŭ dobrych adnosinach ź Siarhiejem Mikałajevičam», — adznačyła Kanapackaja.

Kankretnuju pasadu va ŭradzie jany, pavodle słoŭ Hanny, nie abmiarkoŭvali, pakolki pryznačeńnie ministraŭ — heta prerahatyva Łukašenki. Ale, jak adznačyła Kanapackaja, taja razmova matyvavała jaje iści na vybary 2020 hoda.

Kamientary da artykuła