Iłan Mask vystupiŭ u padtrymku Trampa na pieradvybarčym mitynhu ŭ Piensilvanii
Kandydat u prezidenty ZŠA ad Respublikanskaj partyi Donald Tramp vystupiŭ na pieradvybarčym mitynhu ŭ horadzie Batler u štacie Piensilvanija, dzie 13 lipienia na jaho byŭ ździejśnieny zamach. Tam ža vystupiŭ u jaho padtrymku Iłan Mask.
Iłan Mask vystupaje na pieradvybarnym mitynhu Donalda Trampa, 5 kastryčnika 2024 h., u Batlery, Piensilvanija. Foto: Alex Brandon / AP
«Jak ja ŭžo raniej kazaŭ…» — pačaŭ svoj vystup z žartu Tramp, majučy na ŭvazie svoj pieršy mitynh u Batlery. Kažučy pra zamach, u vyniku jakoha jon byŭ lohka paranieny ŭ vucha, Tramp nazvaŭ čałavieka, što stralaŭ u jaho «pačvaraj» i sparadžeńniem «nieŭtajmavanaha zła», piša BBC.
Na hety raz Tramp znachodziŭsia za kulenieprabivalnym škłom, jaho biaśpieku zabiaśpiečvała padraździaleńnie snajpieraŭ.
Sa słovami padtrymki Trampa na mitynhu vystupiŭ multymiljarder Iłan Mask, jakoha Tramp pradstaviŭ jak «vydatnaha čałavieka, jaki dapamahaje nam budavać nievierahodnuju budučyniu… Jon vyratavaŭ svabodu słova i stvaryŭ mnostva vydatnych rečaŭ».
«Prezident Tramp pavinien pieramahčy na vybarach, kab zachavać Kanstytucyju i demakratyju ŭ Amierycy. Heta situacyja, u jakoj jon abaviazany vyjhrać», — zajaviŭ Mask. Jon nazvaŭ zamach na Trampa ŭ Batlery «sapraŭdnaj pravierkaj charaktaru».
Tramp pravioŭ na trybunie amal paŭtary hadziny i zaviaršyŭ vystupleńnie abiacańniem «viarnuć amierykanskuju maru» i «roskvit u kožnuju siamju».
Piensilvanija — adzin z klučavych Štataŭ na vybarach prezidenta ZŠA, jakija projduć 5 listapada.
Śviežyja sacapytańni fiksujuć tolki nievialikaje, u miežach statystyčnaj chibnaści, razychodžańnie va ŭzroŭniach padtrymki Trampa i jahonaj sapiernicy, vice-prezidenta Kamały Charys, u štatach, jakija vahajucca.
Čytajcie taksama:
U klučavych štatach ZŠA pačała źjaŭlacca rekłama Kamały Charys u padtrymku Ukrainy