Padletak, jakoha zatrymlivali za nibyta padrychtoŭku masavaha zabojstva ŭ Salihorsku, na svabodzie. Pad kryminałkaj i biez techniki
Jon chvaliŭsia «mocnym dacham» u biełaruskaj milicyi, ale heta akazałasia chłuśnioj. Taksama stała viadoma, chto vykanaŭ «zamovu» na školnika.
Zatrymany Illa «Mefi». Vyjava z pres-reliza MUS
15-hadovaha školnika Illu «Mefi» zatrymali paśla taho, jak nibyta ad jaho imieni pa sacsietkach raźniesłasia fejkavaja infarmacyja pra padrychtoŭku da masavaha zabojstva dziaciej.
Illa schłusiŭ u čatach svaich adnadumcaŭ pra toje, što «pracuje na siłavikoŭ i maje ŭ ich dach». Tamu kali jon źnik, to šmat chto nie pavieryŭ, što chłopiec sapraŭdy zatrymany. A nasamreč ź jahonych akaŭntaŭ praciahvali siadzieć siłaviki.
Paśla hetaha byŭ zatrymany jašče adzin biełaruski školnik, siabra Illi pa mianušcy «Staf». Ale nieŭzabavie i «Stafa», i «Mefi» adpuścili — ciapier jany pad padpiskaj ab niavyjeździe jak abvinavačanyja pa artykule 340 Kryminalnaha kodeksu («Zaviedama chłuślivaje paviedamleńnie pra niebiaśpieku»). Taksama ŭ chłopcaŭ kanfiskavali techniku.
Skrynšot z kanała Illi «Miefi»
Paśla taho, jak Illa adšukaŭ novuju techniku, jon stvaryŭ novyja kanały i pierarehistravaŭ akaŭnt. U novym kanale jon piša, što bolš nie budzie zajmacca svatynham (padmannymi miniravańniami), kab nie mieć prablemaŭ z zakonam. I sfakusujecca na «doksinhu» — pošuku źviestak pra ludziej, jakija robiać u internecie «niešta nie toje».
Skrynšot z kanała Illi «Miefi»
Viadoma i chto padstaviŭ chłopca — hrupa svateraŭ, jakaja nazyvajecca Gospartia. Jany prapanujuć pasłuhi pa rassyłcy listoŭ u roznyja miescy z metaj padmannaha miniravańnia, błakiroŭku rekvizitaŭ čałavieka, a taksama vydaleńnie telehram-kanałaŭ abo atrymańnie na ich pamietki «skam».
Skrynšot z kanała Gospartia
Imavierna, Illu i jahonaha siabra čakaje sud. Sankcyja artykuła 340 Kryminalnaha kodeksa praduhledžvaje da piaci hadoŭ kałonii. Ale možna abmiežavacca i štrafam.