Na treci forum «Pojas i šlach» Łukašenku nie zaprasili. Jak heta tłumačać dziaržaŭnyja ŚMI?
Sioletni forum u Piekinie adbyŭsia biez Alaksandra Łukašenki, jaki prysutničaŭ na dvuch papiarednich. Ale dziaržaŭnyja ŚMI zrabili vyhlad, što tak i treba.
Kitajski nacyjanalny kanfierenc-centr, dzie prachodziła cyrymonija adkryćcia treciaha forumu «Pojas i šlach». Fota: AP Photo / Andy Wong
BiełTA 17 kastryčnika paviedamiła, što «delehacyja Kamiteta dziaržaŭnaha kantrolu na čale sa staršynioj viedamstva Vasilom Hierasimavym voźmie ŭdzieł u mierapryjemstvach forumu mižnarodnaha supracoŭnictva «Pojas i šlach».
Hazieta Administracyi Łukašenki «Biełaruś siehodnia» paviedamiła:
«Biełaruskaja delehacyja na čale sa staršynioj Kamiteta dziaržaŭnaha kantrolu Vasilom Hierasimavym naviedaje mierapryjemstvy III Forumu mižnarodnaha supracoŭnictva «Adzin pojas — adzin šlach».
Tema vystupleńnia Hierasimava — «Pytańni prahresu i ŭkładu ŭ śfieru baraćby z karupcyjaj». Jano adbyłosia na adnym sa šmatlikich mierapryjemstvaŭ — tematyčnym forumie «Čysty Šoŭkavy šlach», dzie pradstaŭniki «zvyš 30 krain i mižnarodnych arhanizacyj abmiarkoŭvali pytańni baraćby z karupcyjaj».
Akramia vystupleńnia na panelnaj dyskusii, jak paviedamiła BiełTA, adbylisia sustrečy Hierasimava z kitajskimi čynoŭnikami jaho ŭzroŭniu.
U stužcy navin BiełTA možna znajści paviedamleńnie pra pajezdku Pucina ŭ Kitaj, jaho sustreču padčas forumu z premjer-ministram Vienhryi Viktaram Orbanam, vystupleńnie na forumie hienieralnaha sakratara AAN Antoniu Huteryša z zaklikam da nieadkładnaha spynieńnia ahniu na Blizkim Uschodzie.
«Biełaruś siehodnia» cytuje słovy ŭschodaznaŭca Mikałaja Vaviłava, jakija jon vykazaŭ u efiry Pieršaha kanała Rasii, ab tym, što forum jość
«hłabalnym vyklikam dla ZŠA, sprobaj pabudavać ułasny paradak, jaki b uličvaŭ intaresy Piekina. Heta mierapryjemstva, pa sutnaści, svajho rodu ahlad sajuźnikaŭ Kitaja, jakija ŭ niejkim sensie supraćstajać ZŠA».
Nu, a adnym z hałoŭnych haściej, jak adznačyŭ Vaviłaŭ, zjaŭlajecca Uładzimir Pucin.
Hazieta administracyi Łukašenki apublikavała paviedamleńnie TASS ab tym, što Pucin padzialiŭsia padrabiaznaściami trochhadzinnaj razmovy ź Si Czińpinam.
«Biełaruś siehodnia» na svaim sajcie źmiaściła taksama mierkavańnie analityka Biełaruskaha instytuta stratehičnych daśledavańniaŭ Alaksieja Aŭdonina, jaki nazvaŭ forum «pačatkam pracesu spynieńnia 400-hadovaha panavańnia anhłasaksonskaj impieryi nad astatnim śvietam».
Nie abyšłosia biez zhadki «žamčužyny» prajekta — kitajska-biełaruskaha industryjalnaha parka «Vialiki kamień».
Vydańnie (uśled za BiełTA) cytuje słovy z vystupleńnia na forumie Michaiła Miaśnikoviča jak staršyni Kalehii Jeŭrazijskaj ekanamičnaj kamisii ab tym, što
«kiraŭniki ŭsich dziaržaŭ JEAES padtrymali ideju staršyni KNR Si Czińpina i prezidenta Rasii Uładzimira Pucina ab spałučeńni jeŭrazijskaj intehracyi i inicyjatyvy «Adzin pojas, adzin šlach».
Ab pracy forumu paviedamiła i Biełaruskaje telebačańnie. U pieradačy za 17 kastryčnika pakazali archiŭnyja kadry pieršaha forumu i słovy Łukašenki. A voś u repartažy pra druhi dzień adznačana, što
«na cyrymonii adkryćcia vystupili partniory Biełarusi pa Jeŭrazijskim ekanamičnym sajuzie — prezidenty Rasii i Kazachstana».
Skrynšot repartažu z forumu karespandenta BT
U zaklučnym repartažy karespandent daŭ słova Vasilu Hierasimavu, a paźniej paviedamiŭ, što ŭ forumie ŭdzielničała bolš za 140 krain i 30 mižnarodnych arhanizacyj.
A žurnalistka vydańnia China Daily ŭ intervju adznačyła, što, «niahledziačy na toje, što zachodnija miedyja abvinavačvajuć Kitaj u sprobie kałanizavać krainy z dapamohaj hetaha prajekta, udzielniki forumu bačać, što inicyjatyva pracuje na karyść usim».
Čytajcie jašče:
Čamu Kitaj nie zaprasiŭ Łukašenku na treci forum «Pojas i šlach»
Pierad vystupam Pucina ŭ Piekinie niekalki čałaviek vyjšli z zały
Dvajnik ci nie? Pajezdka Pucina ŭ Piekin znoŭ naradziła sprečki. Hladzim FOTY