Мексіканскі баксёр памёр праз тыдзень пасля атрыманага падчас бою накаўта
26‑гадовы мексіканскі баксёр Артура Торэс памёр менш чым праз тыдзень пасля паядынку з суайчыннікам Хільберта Гарсія, у якім ён пацярпеў паразу накаўтам у сёмым раўндзе. Бой адбыўся 19 верасня, паведаміла прэс-служба прамоўтарскай кампаніі Supreme Boxing.
Артура Торэс
Адразу пасля паядынку Торэса даставілі ў бальніцу. У яго выявілі тромб у галаўным мозгу, пасля чаго спартсмену зрабілі аперацыю і ўвялі яго ў стан штучнай комы.
Нягледзячы на медыцынскую дапамогу, 25 верасня баксёр памёр ад атрыманых падчас бою траўмаў.
Торэс дэбютаваў на прафесійным рынгу ў лістападзе 2018 года. За час кар'еры ён правёў 22 паядынкі: атрымаў 15 перамог, пацярпеў шэсць паразаў, яшчэ адзін бой завяршыўся ўнічыю.