Былога палітвязня Цімура Піпію аб'явілі ў вышук
З часу ягонага вызвалення прайшло тры з паловай месяцы.
Цімур Піпія. Фота: «Вясна»
36‑гадовага Цімура Піпію шукае ГУУС горада Мінска, артыкул Крымінальнага кодэкса, які яму інкрымінуецца, не пазначаны.
Цімур Піпія — былы палітычны зняволены, футбольны заўзятар клуба «МТЗ-РІПО». Ён нарадзіўся 16 студзеня 1990 года.
25 верасня 2020 года Піпію затрымалі ў Мінску ў раёне вуліцы Аэрадромнай, калі ён чакаў напарніка, каб разам паехаць на працу. Крымінальную справу супраць яго завялі ў сувязі з пратэснымі падзеямі 10 жніўня і ўдзелам у акцыі 23 верасня 2020 года, пасля патаемнай інаўгурацыі Аляксандра Лукашэнкі.
Спачатку Цімур праходзіў падазраваным паводле часткі 1 артыкула 293 Крымінальнага кодэкса аб масавых беспарадках. Пазней яму выставілі абвінавачанні паводле часткі 1 артыкула 342, часткі 2 артыкула 293 і артыкула 364 Крымінальнага кодэкса, а таксама артыкула 419.
2 ліпеня 2021 года суд пад старшынствам Святланы Бандарэнка прызначыў яму 6 гадоў, 3 месяцы і 2 дні пазбаўлення волі ў калоніі ўзмоцненага рэжыму. Цімур адбываў пакаранне ў папраўчай калоніі № 15.
28 мая 2026 года Цімур Піпія выйшаў на волю пасля адбыцця прызначанага яму пакарання.
У Цімура ёсць брат Тамаз, які таксама быў асуджаны па палітычных артыкулах, прызнаны палітычным зняволеным і выйшаў на волю 6 мая 2026 года пасля адбыцця 6 з паловай гадоў прызначанага яму пакарання.
Чытайце таксама:
Выйшаў на свабоду палітзняволены фанат Цімур Піпія