Кароль Нідэрландаў запаліў на мундыялі: заўзеў супраць Швецыі, а потым патанчыў у раздзявальні Кюрасаа
Каралеўская сям'я наведала за сем гадзін два матчы: Нідэрланды — Швецыя і Кюрасаа — Эквадор.
Фота: Stefan Koops/EYE4IMAGES/NurPhoto via Getty Images
Каралеўская сям’я Нідэрландаў прыбыла на чэмпіянат свету, дзе ў суботу правяла прыемны дзень: іх парадавалі зборныя абедзвюх краін, што ўваходзяць у склад каралеўства.
Фота: Koen Van Weel / ANP (Photo by ANP via Getty Images
Нідэрландцы ў Х'юстане разграмілі Швецыю — 5:1. Кароль Вілем Аляксандр, каралева Максіма і 19‑гадовая прынцэса Арыяна горача заўзелі на трыбунах.
Потым кароль схадзіў у распранальню, дзе абаронца Вірджыл ван Дэйк не ўпусціў магчымасці зрабіць сэлфі.
Галкіпер Барт Вербруген таксама зрабіў фота з Вілемам-Аляксандрам: «Гэта было прыемна. Кароль сказаў, што я добра згуляў і што яму спадабаўся матч».
А потым каралеўская сям'я паляцела ў Канзас-сіці, дзе Кюрасаа дамаглося гістарычнай нічыёй з Эквадорам (0:0). Яна прысутнічала на абедзвюх гульнях — і гэта было весела.
Яны нават адклалі ўбок аранжавыя колеры і пераапрануліся ў сіняе бо мянушка астраўной каманды — «Сіняя хваля». І сцяг у Кюрасаа сіні — адсылка да неба і Карыбскага мора, піша sports.ru.
Фота: Alex Pantling — FIFA/FIFA via Getty Images
Пасля матчу манарх зайшоў у раздзявальню, каб павіншаваць Дзіка Адваката і ўсю зборную з першым набраным балам на чэмпіянатах свету.
Фота: Alex Pantling — FIFA/FIFA via Getty Images
Атмасфера была вельмі расслабленая — ніякага афіцыёзу, высокія госці проста патанцавалі разам з гульцамі.
На матчы Вілем-Аляксандр сядзеў побач з Джані Інфанціна, а пасля гульні выдаў невялікі стэндап: «Я тут госць ФІФА, таму калі на матчы прысутнічае Інфанціна, я сяджу побач з ім. Але, магчыма, я паспеў прапанаваць яму некалькі кандыдатур на Прэмію міру на найбліжэйшыя гады.
Калі казаць пра гульню, то некалькі разоў я нават глядзеў, дзе знаходзіцца дэфібрылятар, бо ён мог мне спатрэбіцца. Часам гэта было не вельмі карысна для майго сэрца. Я ўдзячны, што змог трапіць у гэтую раздзявальню ад імя астатніх 18 мільёнаў трэнераў зборнай».
У трэцім туры Кюрасаа ў Філадэльфіі згуляе з Кот д'Івуарам, а Нідэрланды ў Канзас-сіці з Тунісам.
Кюрасаа — невялічкая выспа ў Карыбскім моры з насельніцтвам 155 тысяч чалавек. Самакіраванае тэрытарыяльнае ўтварэнне ў складзе Нідэрландаў. Востраў мае шырокую аўтаномію: уласны ўрад, парламент, канстытуцыю і заканадаўства, але за знешнюю палітыку і абарону адказваюць Нідэрланды. Але з'яўляецца членам ФІФА, як Гібралтар ці Фарэрскія выспы.