Лукашэнка ўпершыню заклікаў і Расію «пайсці на кампраміс»
Аляксандр Лукашэнка ў інтэрв’ю тэлеканалу «Аль-Арабія» выказаў меркаванне, што жорсткая пазіцыя так званай «еўратройкі» — Вялікабрытаніі, Францыі і Германіі — у дачыненні да Расіі звязаная з перамоўнай тактыкай перад магчымымі мірнымі перамовамі.
Аляксандр Лукашэнка з прэзідэнтам Расіі Уладзімірам Пуціным. Фота: AP Photo Pavel Bednyakov, Pool
Лукашэнка згадаў сустрэчу ў Лондане лідараў гэтых трох краін з прэзідэнтам Украіны Уладзімірам Зяленскім, па выніках якой было прынята сумесная заява з пяці пунктаў. Паводле Лукашэнкі, агучаныя там патрабаванні з’яўляюцца непрымальнымі для Расіі.
«Класіка. Заўсёды ў пачатку дыялогу, калі яны гэтага хочуць, а, відаць, еўрапейскія дзяржавы ўжо схіляюцца да гэтага, на перамовах задаеш самую высокую планку, каб потым можна было ад гэтага адступіць», — адзначыў ён.
На думку Лукашэнкі, такая пазіцыя можа быць пачатковым этапам перамоўнай стратэгіі. Ён таксама заўважыў, што і расійская пазіцыя першапачаткова была сфармулявана ў максімальна жорсткім выглядзе.
«Расійская пазіцыя таксама максімальная, яна была заяўлена. Але цяпер трэба сесці за стол перамоў і зблізіць гэтыя пазіцыі. А каб зблізіць пазіцыі, трэба ісці на кампраміс. Калі мы хочам скончыць гэтую вайну — адзін бок і другі», — прымірэнча заявіў Лукашэнка.