Łukašenka ŭpieršyniu zaklikaŭ i Rasiju «pajści na kampramis»
Alaksandr Łukašenka ŭ intervju telekanału «Al-Arabija» vykazaŭ mierkavańnie, što žorstkaja pazicyja tak zvanaj «jeŭratrojki» — Vialikabrytanii, Francyi i Hiermanii — u dačynieńni da Rasii źviazanaja ź pieramoŭnaj taktykaj pierad mahčymymi mirnymi pieramovami.
Alaksandr Łukašenka z prezidentam Rasii Uładzimiram Pucinym. Fota: AP Photo Pavel Bednyakov, Pool
Łukašenka zhadaŭ sustreču ŭ Łondanie lidaraŭ hetych troch krain z prezidentam Ukrainy Uładzimiram Zialenskim, pa vynikach jakoj było pryniata sumiesnaja zajava ź piaci punktaŭ. Pavodle Łukašenki, ahučanyja tam patrabavańni źjaŭlajucca nieprymalnymi dla Rasii.
«Kłasika. Zaŭsiody ŭ pačatku dyjałohu, kali jany hetaha chočuć, a, vidać, jeŭrapiejskija dziaržavy ŭžo schilajucca da hetaha, na pieramovach zadaješ samuju vysokuju płanku, kab potym možna było ad hetaha adstupić», — adznačyŭ jon.
Na dumku Łukašenki, takaja pazicyja moža być pačatkovym etapam pieramoŭnaj stratehii. Jon taksama zaŭvažyŭ, što i rasijskaja pazicyja pieršapačatkova była sfarmulavana ŭ maksimalna žorstkim vyhladzie.
«Rasijskaja pazicyja taksama maksimalnaja, jana była zajaŭlena. Ale ciapier treba sieści za stoł pieramoŭ i zblizić hetyja pazicyi. A kab zblizić pazicyi, treba iści na kampramis. Kali my chočam skončyć hetuju vajnu — adzin bok i druhi», — prymirenča zajaviŭ Łukašenka.