ФІФА запатрабавала ад зборнай Гаіці змяніць дызайн формы за некалькі дзён да старту чэмпіянату свету

Усё з-за батальнай сцэны на ёй.

На форме, якая выкарыстоўвалася ў двух перадтурнірных таварыскіх матчах, былі змешчаны ілюстрацыя бітвы пры Верцьеры 1803 года, што забяспечыла незалежнасць Гаіці, а таксама першы дзяржаўны сцяг краіны.

Фота: Leonardo Fernandex / Getty Images

Аднак рэгламент міжнароднай федэрацыі забараняе размяшчаць на экіпіроўцы любыя палітычныя, рэлігійныя або асабістыя пасланні і лозунгі.

ФІФА палічыла, што некаторыя візуальныя элементы могуць па-рознаму інтэрпрэтавацца ў рамках яе рэгламенту адносна экіпіроўкі, і ў выніку запатрабавала ўнесці змены ў дызайн.

Зборная Гаіці гуляе на чэмпіянаце свету ў адной групе з Бразіліяй, Шатландыяй і Марока. Свой першы матч яна правядзе з Шатландыяй у ноч на нядзелю. Пачатак а 4‑й раніцы па Мінску.

А наогул гэта першынство другое для Гаіці. Упершыню на чэмпіянаце свету гэта карыбская зборная згуляла ў 1974 годзе, але прайграла ўсе тры паядынкі ў групе.

Каментары да артыкула