Кіраўнік Пентагона дапусціў магчымасць выкрадання прэзідэнта Кубы
Канчатковае рашэнне прыме Дональд Трамп.
Мігель Дыяс-Канель кіруе Кубай з 2018 года, хоць па звестках моцны ўплыў на палітыку працягвае аказваць 94‑гадовы Рауль Кастра Фота: Emilio Flores / Anadolu via Getty Images
Кіраўнік Пентагона Піт Хегсэт заявіў, што ЗША разглядаюць магчымасць выкрадання прэзідэнта Кубы Мігеля Дыяса-Канеля, пішуць амерыканскія СМІ.
Аднак канчатковае рашэнне прыме Дональд Трамп, дадаў ён.
Хмары над Кубай згусціліся пасля таго, як ЗША захапілі 3 студзеня ў Каракасе Нікаласа Мадура і яго жонку, а потым нанеслі ўдар па Іране.
Топ-чыноўнікі ў Вашынгтоне неаднаразова заяўлялі, што Куба — наступная, на каго звернуць увагу ЗША.
Вашынгтон мае намер дамагчыся змены палітычнага рэжыму на Кубе і будзе займацца гэтым пасля завяршэння вайны з Іранам, заявіў на мінулым тыдні Дональд Трамп.
«У нас вельмі добрыя планы ў адносінах да Кубы. Я думаю, нам давядзецца пазбавіцца рэжыму, які быў вельмі жорсткім, вельмі непрыемным. Мы разбяромся з Ісламскай Рэспублікай Іран, і як толькі гэта будзе зроблена, па дарозе назад мы на кароткі час спынімся, каб заняцца гэтым. Мы хочам ім дапамагчы», — сказаў кіраўнік Белага дома падчас размовы з журналістамі.
Чытайце таксама:
Трамп заявіў пра планы змяніць рэжым на Кубе пасля таго, як разбярэцца з Іранам