Беларусь увайшла ў топ-40 сусветных імпарцёраў зброі
У новым дакладзе Стакгольмскага міжнароднага інстытута даследавання праблем міру (SIPRI) Беларусь згаданая як 32‑гі ў свеце пакупнік зброі. Аб’ёмы закупак склалі 0,9% ад сусветных, у папярэдні перыяд (2016—2020 гадоў) яны былі на ўзроўні 0,5%, піша выданне «Белорусы и рынок».
Здымак ілюстрацыйны. Фота: t.me/novostistolina
Амаль 100% узбраення ў перыяд 2021—2025 гадоў было атрымана ў Расіі. Агулам Беларусь стала трэцім пасля Індыі (48%) і Кітая (13%) пакупніком расійскай зброі з прыкладна 13% ад усяго экспарту расійскага ВПК. Мізэрныя партыі зброі (0,1% і менш за 0,05%) у гэтым перыядзе трапілі ў Беларусь з, адпаведна, Ірана і Кітая.
Найбуйнейшым імпарцёрам узбраенняў стала Украіна з доляй 9,7% ад сукупных сусветных закупак. Галоўнымі іх крыніцамі сталі ЗША (41%), Германія (14%) і Польшча (9,4%).
Другое і трэцяе месца па мілітарызацыі занялі Індыя (8,2% ад сусветнага імпарту) і Саудаўская Аравія (6,8%). Звяртае на сябе ўвагу актыўнасць такой манархіі Персідскага заліва, як Катар. Гэтая краіна стала чацвёртай з паказчыкам 6,4%.
А вось найбуйнейшым экспарцёрам, паводле звестак SIPRI, застаюцца ЗША. На іх у 2021—2025 гадах прыпала 42% усяго аб’ёму паставак зброі. Ключавымі пакупнікамі амерыканскай зброі сталі Саудаўская Аравія (12%), Украіна (9,4%) і Японія (8,9%).
Чытайце таксама:
Да канца года ў серыйную вытворчасць збіраюцца запусціць беларускі аўтамат
Вальфовіч упэўнены, што савецкая вайсковая тэхніка ў Беларусі праслужыць яшчэ гадоў з 20