На якіх вуліцах Мінска часцей за ўсё спыняюцца турысты?

У Мінску самай папулярнай вуліцай для арэнды жылля на суткі стала вуліца Ігара Лучанка. Паводле звестак сэрвісу «Куфар Падарожжаў», менавіта там турысты часцей за ўсё спыняліся на начлег — за мінулы год каля 13 тысяч разоў, піша Office Life.

Вуліца Лучанка ў Мінску. Фота: Яндэкс Карты

Увогуле рынак пасутачнай арэнды працягвае расці: за год у Беларусі было забраніравана больш за 400 тысяч начэй у кватэрах.

Высокім попытам у сталіцы таксама карыстаюцца кватэры на вуліцах Пятра Мсціслаўца, Ніколы Тэслы, Белградскай і на праспекце Міру. Большасць з іх знаходзіцца ў новых мікрараёнах, пераважна ў комплексе «Мінск-Свет». Аналітыкі тлумачаць папулярнасць гэтай лакацыі вялікай прапановай, сучасным рамонтам і адносна даступнымі цэнамі.

У дзясятку самых запатрабаваных таксама ўвайшлі праспект Дзяржынскага, вуліцы Прытыцкага, Брацкая, Брылеўская і Аэрадромная. Пры гэтым турысты ахвотна выбіраюць і кватэры ў дамах старой забудовы — попытам карыстаюцца праспекты Незалежнасці і Пераможцаў.

У рэгіёнах таксама назіраецца рост цікавасці да пасутачнай арэнды. У Брэсце найбольш запатрабаваная вуліца Гогаля, у Віцебску — Маскоўскі праспект, у Гомелі — праспект Перамогі. У Гродне найбольш прапаноў на вуліцы Курчатава, а ў Магілёве — на праспекце Міру.

Каментары да артыкула