AP: ФБР не знайшло доказаў таго, што Эпштэйн кіраваў сеткай па гандлі людзьмі

Да такой высновы прыйшло агенцтва Associated Press, вывучыўшы апублікаваныя Міністэрствам юстыцыі ЗША «файлы Эпштэйна».

Джэфры Эпштэйн. Фота: Rick Friedman/Rick Friedman Photography/Corbis via Getty Images

Пры гэтым сцвярджаецца, што следства сабрала вычарпальныя доказы гвалту над дзяўчатамі з боку самога фінансіста, але не знайшло пацвярджэнняў таго, што ён сістэмна пастаўляў ахвяр прадстаўнікам сусветнай эліты.

Хоць адна з ахвяр Эпштэйна публічна заяўляла, што ён «пазычаў» яе сваім багатым сябрам, агенты не змаглі гэта пацвердзіць і не знайшлі іншых пацярпелых, якія распавядалі б падобныя гісторыі.

Праверка фінансавых транзакцый на карысць уплывовых асоб са свету навукі і дыпламатыі таксама не выявіла злачыннага складніка.

Адзначаецца, што AP і іншыя СМІ працягваюць вывучаць «мільёны старонак» дакументаў і «магчыма, у гэтых запісах утрымліваюцца доказы, прапушчаныя следчымі»

Каментары да артыкула