«Гэта ж махінацыя». Беларуска дапамагла сяброўцы зрабіць польскую візу і атрымала галаўны боль з банкам

Сяброўка Вікторыі (усе імёны змененыя з меркавання бяспекі) хацела аформіць дачцэ польскую візу і папрасіла дапамогі — пазычыць ёй ненадоўга грошы, каб пацвердзіць у консульстве сваю фінансавую здатнасць. Жанчына пагадзілася і перавяла буйную суму. Неўзабаве яе рахунак аказаўся часткова заблакаваны. Беларуска расказала выданню Most, у чым аказалася праблема і як яна яе вырашала.

Здымак ілюстрацыйны. Фота: freepik.com

Вікторыя жыве ў Польшчы чатыры гады. Адразу па прыездзе ў гэтую краіну яна адкрыла рахунак у банку PKO. Калі яе сяброўка Валянціна папрасіла пазычыць 25 тысяч злотых (каля 7 тысяч даляраў), гэта не выклікала ў яе трывогі. Той трэба было толькі прадэманстраваць консульству, што ў яе ёсць грошы, каб аформіць студэнцкую візу дачцэ, якая на той момант знаходзілася ў Беларусі. Потым яна абяцала вярнуць усю суму.

Сяброўкі без праблем аформілі перавод у аддзяленні PKO, Валянціна атрымала выпіску — і жанчыны папрасілі супрацоўніцу банка вярнуць грошы назад.

«У банку нас за гэта пальчыкам пажурылі, — кажа Вікторыя. — Яна [супрацоўніца банка. — Заўв. Most] кажа: «А што гэта: грошы перавялі, выпіску сяброўка ўзяла і пераводзіце назад? Гэта ж махінацыя». Мы такія: «А, ну тады не трэба». І пайшлі».

«Не магла атрымліваць ніякія пераводы»

Каб не выклікаць падазрэнняў, Валянціна пераводзіла Вікторыі сродкі часткамі на працягу некалькіх дзён. Аднак банк не пакінуў гэта без увагі — праз некалькі тыдняў беларуска атрымала ліст з патрабаваннем пацвердзіць паходжанне грошай.

«І рахунак мне заблакавалі: не магла атрымліваць ніякія пераводы — ні заробак, ні блік», — узгадвае жанчына.

Беларуска ўзяла ў працадаўцы пацвярджэнне аб пералічэнні заробкаў і адправілася ў банк. Але гэта не дапамагло.

«Яны там як на дурніцу на мяне глядзелі. Кажуць: «А што там за ліст? Шліце ў электронным выглядзе», — расказвае яна. — [Поўны доступ] да рахунка так і не разблакавалі. Я падумала: «Ды пайшлі вы», — і адкрыла рахунак у Santander Bank».

«У нас нават няма такога кліента»

Буйная сума, якая заставалася на рахунку ў PKO, працягвала там ляжаць. Жанчына ўсё яшчэ магла ёй карыстацца — плаціла за жыллё і па іншых рахунках. Але праз нейкі час пабачыла, што яе мабільны дадатак перастаў працаваць. Пераўсталяванне не дало выніку — Вікторыі зноў прыйшлося наведаць банк.

«Прыходжу, а яны мне кажуць: «У нас нават няма такога кліента». Я кажу: «Вы што, таварышы! У мяне там грошы ляжаць — 20 тысяч злотых», — эмацыйна ўспамінае Вікторыя. — [Потым] падышла старшая [супрацоўніца] і сказала, што мае грошы ляжаць у іх на нейкім аварыйным рахунку».

Вікторыі прапанавалі два варыянты: забраць грошы наяўнымі альбо перавесці іх на іншы банкаўскі рахунак. Яна выбрала другі варыянт — падала нумар новага рахунку і пачала чакаць. Але грошы ўсё не паступалі.

«Дзе мае грошы?»

Беларуска зноў адправілася ў аддзяленне.

«Прыйшла да іх зноў і пытаюся: «Дзе мае грошы?» А яны: маўляў, я няправільны нумар рахунка дала. Потым сказалі, што адправілі [паўторна]. Я запатрабавала пацвярджэнне, каб быць дакладна ўпэўненай і каб, калі што, патлумачыць іншаму банку, адкуль грошы. Гэтым разам грошы прыйшлі».

Але Вікторыі ўсё адно неспакойна. Цяпер яна думае, як больш бяспечна захоўваць ашчаджэнні, каб не страціць да іх доступ.

Каментары да артыкула